evaṃ tattha tattha matthaluṅgaṃ aṭṭhimiñjena saṅgahetvā desitakāyagatāsati- koṭṭhāsabhāvanāpariyāyaṃ dvattiṃsākārakammaṭṭhānaṃ āraddhaṃ, tassāyaṃ atthavaṇṇanā:-

tattha atthīti saṃvijjanti. Imasminti yvāyaṃ uddhaṃ pādatalā adho kesamatthakā tacapariyanto pūro nānappakārassa asucinoti vuccati, tasmiṃ. Kāyeti sarīre. Sarīrañhi asucisañcayato, kucchitānaṃ vā kesādīnañceva cakkhurogādīnañca rogasatānaṃ āyabhūtato kāyoti vuccati. Kesā .pe. Matthaluṅganti ete kesādayo dvattiṃsākārā, tattha "atthi imasmiṃ kāye kesā lomā"ti evampi sambandho veditabbo. Tena kiṃ kathitaṃ hoti? imasmiṃ pādatalā paṭṭhāya upari, kesamatthakā paṭṭhāya heṭṭhā, tacato paṭṭhāya paritoti ettake byāmamatte kaḷevare sabbādarenapi vicinanto na koci kiñci muttaṃ vā maṇiṃ vā veḷuriyaṃ vā agaruṃ vā candanaṃ vā kukumaṃ vā kappūraṃ vā vāsacuṇṇādiṃ vā aṇumattampi sucibhāvaṃ passati, athakho paramaduggandhajegucchaṃ asirīkadassanaṃ nānappakāraṃ kesalomādibhedaṃ asuciṃyeva passatīti.

Ayantāvettha padasambandhato vaṇṇanā.

Asubhabhāvanā