"uṭṭhānenappamādenāti imaṃ dhammadesanaṃ satthā veḷuvane viharanto cūḷapanthakattheraṃ ārabbha kathesi.

Rājagahe kira dhanaseṭṭhikulassa dhītā vayappattakāle mātāpitūhi sattabhūmikassa pāsādassa uparitale ativiya rakkhiyamānā yobbanamadamattatāya purisalolā hutvā attano dāseneva saddhiṃ santhavaṃ katvā "aññepi me idaṃ kammaṃ jāneyyunti bhītā evamāha "amhehi imasmiṃ ṭhāne na sakkā vasituṃ, sace mama mātāpitaro imaṃ dosaṃ jānissanti, khaṇḍākhaṇḍikaṃ maṃ karissanti; videsaṃ gantvā vasissāmāti. Te gehe hatthasāraṃ gahetvā uttarena dvārena nikkhamitvā "yattha vā tattha vā aññehi ajānanaṭṭhānaṃ gantvā vasissāmāti ubhopi agamaṃsu.

Tesaṃ ekasmiṃ ṭhāne vasantānaṃ saṃvāsamanvāya tassā kucchismiṃ gabbho patiṭṭhāsi. Sā gabbhaparipākamāgamma tena saddhiṃ mantesi "gabbho me paripākaṃ gato, ñātibandhuvirahite ṭhāne gabbhavuṭṭhānaṃ nāma ubhinnaṃpi amhākaṃ dukkhāvahaṃ, kulagehameva gacchāmāti. So "sacāhaṃ tattha gamissāmi, jīvitaṃ me natthīti bhayena "ajja gacchāma sve gacchāmāti divase atikkāmesi. Sā cintesi "ayaṃ bālo attano dosamahantatāya gantuṃ na ussahati, mātāpitaro nāma ekantahitāva, ayaṃ gacchatu vā mā vā, ahaṃ gamissāmīti. Sā, tasmiṃ gehā nikkhante, gehaparikkhāraṃ paṭisāmetvā attano kulagharagamanabhāvaṃ anantaragehavāsīnaṃ ārocetvā maggaṃ paṭipajji. Sopi gharaṃ āgantvā taṃ adisvā paṭivissake pucchitvā "kulagharaṃ gatāti sutvā vegena anubandhitvā antarāmagge sampāpuṇi. Tassāpi tattheva gabbhavuṭṭhānaṃ ahosi. So "kiṃ idaṃ bhaddeti pucchi. "sāmi eko putto jātoti. "idāni kiṃ karissāmāti. "yassatthāya mayaṃ kulagharaṃ gaccheyyāma, taṃ kammaṃ antarāmaggeva nipphannaṃ, tattha gantvā kiṃ karissāma, nivattāmāti dve ekacittā hutvā nivattiṃsu. Tasseva dārakassa panthe jātattā "panthakoti nāmaṃ kariṃsu. Tassā nacirasseva aparopi gabbho patiṭṭhahi. Sabbaṃ purimanayeneva vitthāretabbaṃ. Tassāpi dārakassa panthe jātattā paṭhamaṃ jātassa "mahāpanthakoti nāmaṃ katvā pacchā jātassa "cūḷapanthakoti nāmaṃ kariṃsu. Te dvepi dārake gahetvā attano vasanaṭṭhānameva gatā.