Tesaṃ tattha vasantānaṃ, mahāpanthakadārako aññe dārake "cūḷapitā mahāpitāti "ayyako ayyikāti ca vadante sutvā mātaraṃ pucchi "amma aññe dārakā `ayyakoti vadanti `ayyikāti vadanti, kacci amhākaṃ ñātakā natthīti. "āma tāta amhākaṃ ettha ñātakā natthi, rājagahanagare pana vo dhanaseṭṭhī nāma ayyako, tattha amhākaṃ bahū ñātakāti. "kasamā tattha na gacchāma ammāti. Sā attano āgamanakāraṇaṃ puttassa akathetvā, puttesu punappunaṃ kathentesu, sāmikaṃ āha "ime maṃ dārakā ativiya kilamenti, kiṃ no mātāpitaro disvā maṃsaṃ khādissanti, ehidāni dārakānaṃ ayyakakulaṃ dassessāmāti. "ahaṃ sammukhā bhavituṃ na sakkhissāmi, te pana nayissāmīti. "sādhu yena kenaci upāyena dārakānaṃ ayyakakulameva daṭṭhuṃ vaṭṭatīti. Dvepi janā dārake ādāya anupubbena rājagahaṃ patvā nagaradvāre ekissā sālāya vasiṃsu. Dārakamātā dve dārake gahetvā āgatabhāvaṃ mātāpitūnaṃ ārocāpesi. Te taṃ sāsanaṃ sutvā "saṃsāre vicarantānaṃ na putto na dhītā bhūtapubbā nāma natthi; te amhākaṃ mahāparādhikā, na sakkā tehi amhākaṃ cakkhupathe ṭhātuṃ, ettakannāma dhanaṃ gahetvā dvepi janā phāsukaṭṭhānaṃ gantvā jīvantu, dārake pana idha pesentūti. Te tehi pesitaṃ dhanaṃ gahetvā dārake āgatadūtānaññeva hatthe datvā pahiṇiṃsu. Dārakā ayyakakule vaḍḍhanti.

Tesu cūḷapanthako atidaharo, mahāpanthako pana ayyakena saddhiṃ dasabalassa dhammakathaṃ sotuṃ gacchati. Tassa niccaṃ satthu santikaṃ gacchantassa, pabbajjāya cittaṃ nami. So ayyakaṃ āha "sace maṃ anujāneyyātha, ahaṃ pabbajeyyanti. "kiṃ vadesi tāta, sakalalokassāpi me pabbajitato tava pabbajjā bhaddakā; sace sakkosi, pabbajāhīti taṃ satthu santikaṃ netvā, "kiṃ gahapati dārako te laddhoti vutte, "āma bhante ayaṃ me nattā tumhākaṃ santike pabbajitukāmoti āha. Satthā aññataraṃ piṇḍacārikaṃ bhikkhuṃ "imaṃ dārakaṃ pabbājehīti āṇāpesi. Thero tassa tacapañcakakammaṭṭhānaṃ ācikkhitvā pabbājesi. So bahuṃ buddhavacanaṃ uggaṇhitvā paripuṇṇavasso upasampadaṃ labhitvā yonisomanasikāre kammaṃ karonto arahattaṃ pāpuṇi.