tapantamādiccamivantalikkheti. Imaṃ ekaṃ gāthaṃ catūhi māsehi uggaṇhituṃ nāsakkhi. "kasmāti. So kira kassapasammāsambuddhakāle pabbajitvā paññavā hutvā aññatarassa dandhabhikkhuno uddesagahaṇakāle parihāsakeḷiṃ akāsi. So bhikkhu tena parihāsena lajjito neva uddesaṃ gaṇhi na sajjhāyamakāsi. Tena kammena ayaṃ pabbajitvāva dandho jāto, gahitagahitapadaṃ, uparuparipadaṃ uggaṇhantassa, nassati. Tassa imameva gāthaṃ uggahetuṃ vāyamantassa, cattāro māsā atikkantā. Atha naṃ mahāpanthako "cūḷapanthaka tvaṃ imasmiṃ sāsane abhabbo, catūhi māsehi ekaṃ gāthaṃpi gahetuṃ na sakkosi, pabbajitakiccaṃ pana kathaṃ matthakaṃ pāpessasi, nikkhama itoti vihārā nikkaḍḍhi. Cūḷapanthako buddhasāsane sinehena gihibhāvaṃ na pattheti.
Tasmiñca kāle mahāpanthako bhattuddesako hoti. Jīvako komārabhacco bahuṃ mālāgandhavilepanamādāya ambavanaṃ gantvā satthāraṃ pūjetvā dhammaṃ sutvā uṭṭhāyāsanā dasabalaṃ vanditvā mahāpanthakaṃ upasaṅkamitvā "kittakā bhante satthu santike bhikkhūti pucchi. "pañcamattāni bhikkhusatānīti. "sve bhante buddhappamukhāni pañcabhikkhusatāni ādāya amhākaṃ nivesane bhikkhaṃ gaṇhathāti. "upāsaka cūḷapanthako nāma dandho bhikkhu aviruḷhidhammo, taṃ ṭhapetvā sesānaṃ nimantanaṃ sampaṭicchāmīti thero āha. Taṃ sutvā cūḷapanthako Cintesi "thero ettakānaṃ bhikkhūnaṃ nimantanaṃ sampaṭicchanto maṃ bāhiraṃ katvā sampaṭicchati, nissaṃsayaṃ mayhaṃ bhātikassa mayi cittaṃ bhinnaṃ bhavissati; kiṃ idāni mayhaṃ iminā sāsanena, gihī hutvā dānādīni puññāni karonto jīvissāmīti. So punadivase pātova vibbhamituṃ pāyāsi. Satthā paccūsakāleyeva lokaṃ volokento imaṃ kāraṇaṃ disvā paṭhamataraṃ gantvā cūḷapanthakassa gamanamagge dvārakoṭṭhake caṅkamanto aṭṭhāsi. Cūḷapanthako gacchanto satthāraṃ disvā upasaṅkamitvā vandi. Atha naṃ satthā "kahaṃ pana tvaṃ cūḷapanthaka imāya velāya gacchasīti āha. "bhātā maṃ bhante nikkaḍḍhati, tenāhaṃ vibbhamituṃ gacchāmīti. "cūḷapanthaka tava pabbajjā nāma mama santike, bhātarā nikkaḍḍhitopi kasmā mama santikaṃ nāgacchi; ehi, kinte gihibhāvena, mama santike bhavissasīti cakkaṅkitatalena pāṇinā taṃ sirasi parāmasitvā ādāya gantvā gandhakuṭipamukhe nisīdāpetvā "cūḷapanthaka puratthābhimukho hutvā imaṃ pilotikaṃ `rajoharaṇaṃ rajoharaṇanti parimajjanto idheva hohīti iddhiyā abhisaṅkhataṃ parisuddhaṃ pilotikaṃ datvā, kāle ārocite, bhikkhusaṅghaparivuto jīvakassa gehaṃ gantvā paññattāsane nisīdi. Cūḷapanthakopi suriyaṃ olokento taṃ pilotikaṃ "rajoharaṇaṃ rajoharaṇanti parimajjanto nisīdi. Tassa taṃ pilotikakhaṇḍaṃ parimajjantassa kiliṭṭhaṃ ahosi. Tato cintesi "idaṃ pilotikakhaṇḍaṃ ativiya parisuddhaṃ, imaṃ pana attabhāvaṃ nissāya purimapakatiṃ jahitvā evaṃ kiliṭṭhaṃ jātaṃ, aniccā vata saṅkhārāti Khayavayaṃ paṭṭhapento vipassanaṃ vaḍḍhesi. Satthā "cūḷapanthakassa cittaṃ vipassanaṃ āruḷhanti ñatvā "cūḷapanthaka tvaṃ etaṃ pilotikakhaṇḍameva saṅkiliṭṭhaṃ rajarañjitanti mā saññaṃ kari; abbhantare pana te rāgarajādayo atthi, te harāhīti vatvā obhāsaṃ vissajjetvā purato nisinno viya paññāyamānarūpo hutvā imā gāthā abhāsi