Ahaṃ cūḷapanthakoti mukhasahassaṃ uṭṭhahi. So puriso puna gantvā "sabbepi kira bhante cūḷapanthakāyeva nāmāti āha. "tenahi gantvā, yo paṭhamaṃ `ahaṃ cūḷapanthakoti vadati, taṃ hatthe gaṇha, avasesā antaradhāyissantīti. So tathā akāsi. Tāvadeva sahassamattā bhikkhū antaradhāyiṃsu. Thero tena purisena saddhiṃ agamāsi. Satthā bhattakiccapariyosāne jīvakaṃ āmantesi "jīvaka cūḷapanthakassa pattaṃ gaṇha, ayante anumodanaṃ karissatīti. Jīvako tathā akāsi. Thero sīhanādaṃ nadanto taruṇasīho viya tīṇi piṭakāni saṅkhobhetvā anumodanaṃ akāsi. Satthā uṭṭhāyāsanā bhikkhusaṅghaparivuto vihāraṃ gantvā, bhikkhūhi vatte dassite, uṭṭhāyāsanā gandhakuṭipamukhe ṭhatvā bhikkhusaṅghassa sugatovādaṃ datvā kammaṭṭhānaṃ kathetvā bhikkhusaṅghaṃ uyyojetvā surabhigandhavāsitaṃ gandhakuṭiṃ pavisitvā dakkhiṇena passena sīhaseyyaṃ upagato.
Atha sāyaṇhasamaye bhikkhū ito cito ca samosaritvā rattakambalasāṇiyā parikkhittā viya nisīditvā satthu guṇakathaṃ ārabhiṃsu "āvuso mahāpanthako cūḷapanthakassa ajjhāsayaṃ ajānanto catūhi māsehi ekaṃ gāthaṃ uggaṇhāpetuṃ na sakkoti, `dandho ayanti vihārā nikkaḍḍhi; sammāsambuddho pana attano anuttaradhammarājatāya ekasmiññeva antarābhatte saha paṭisambhidāhi arahattaṃ adāsi; tīṇi piṭakāni saha paṭisambhidāhiyeva āgatāni; aho buddhānaṃ balannāma mahantanti. Atha bhagavā dhammasabhāyaṃ imaṃ kathāpavattiṃ ñatvā "ajja Mayā gantuṃ vaṭṭatīti buddhaseyyāya uṭṭhāya surattadupaṭṭaṃ nivāsetvā vijjulataṃ viya kāyabandhanaṃ bandhitvā rattakambalasadisaṃ sugatamahāpaṃsukūlacīvaraṃ pārupitvā surabhigandhakuṭito nikkhamma mattavaravāraṇasīhavikkantavilāsena anantāya buddhalīḷhāya dhammasabhaṃ gantvā alaṅkatamaṇḍalamālamajjhe supaññattapavarabuddhāsanaṃ āruyha chabbaṇṇā buddharaṃsiyo vissajjento aṇṇavakucchiṃ khobhayamāno viya yugandharamatthake bālasuriyo viya āsanamajjhe nisīdi. Sammāsambuddhe pana āgatamatte, bhikkhusaṅgho kathaṃ pacchinditvā tuṇhī ahosi. Satthā mudukena cittena parisaṃ oloketvā "ayaṃ parisā ativiya sobhati, ekassāpi hatthakukkuccaṃ vā pādakukkuccaṃ vā ukkāsitasaddo vā khipitasaddo vā natthi, sabbepime buddhagāravena sagāravā buddhatejena tajjitā, mayi āyukappampi akathetvā nisinne, keci paṭhamaṃ kathaṃ samuṭṭhāpetvā na kathessanti, kathāsamuṭṭhāpanavattannāma mayā jānitabbaṃ, ahameva paṭhamaṃ kathessāmīti madhurena brahmasarena bhikkhū āmantetvā "kāya nuttha bhikkhave etarahi kathāya sannisinnā, kā ca pana vo antarā kathā vippakatāti pucchitvā, "imāya nāmāti vutte, "na bhikkhave cūḷapanthako idāneva dandho, pubbepi dandhova; na kevalañcassāhaṃ idāneva avassayo jāto, pubbepi avassayo ahosiṃyeva; pubbe panāhaṃ imaṃ lokiyakuṭumbassa sāmikaṃ akāsiṃ, idāni lokuttarakuṭumbassāti vatvā, tamatthaṃ vitthārato sotukāmehi bhikkhūhi yācito atītaṃ āhari: