Sujātā pana kālaṃ katvā ekissā girikandarāya bakasakuṇikā hutvā nibbatti. Sakko attano paricārikāyo olokento "sudhammā idheva nibbattā. Tathā sunandā ca sucittā cāti ñatvā "sujātā nu kho kuhiṃ nibbattāti cintento taṃ tattha nibbattaṃ disvā "ayaṃ bālā kiñci puññaṃ akatvā idāni tiracchānayoniyaṃ nibbattā, idānipi naṃ puññaṃ kārāpetvā idhānetuṃ vaṭṭatīti, attabhāvaṃ vijahitvā aññātakavesena tassā santikaṃ gantvā "kiṃ karontī idha vicarasīti pucchi. "ko pana tvaṃ sāmīti. "ahaṃ te sāmiko maghoti. "kuhiṃ nibbattosi sāmīti. "ahaṃ tāvatiṃsadevaloke nibbattomhi, tava sahāyikānaṃ pana nibbattaṭṭhānaṃ jānāsīti. "na Jānāmi sāmīti. "tāpi mameva santike nibbattā, passissasi te sahāyikāti. "kathāhaṃ tattha gamissāmīti. Sakko "ahaṃ taṃ tattha nessāmīti vatvā devalokaṃ netvā nandāya pokkharaṇiyā tīre vissajjetvā itarāsaṃ tissannaṃ ārocesi "tumhākaṃ sahāyikaṃ sujātaṃ passissathāti. "kuhiṃ sā devāti. "nandāya pokkharaṇiyā tīre ṭhitāti āha. Tā tissopi tattha gantvā "aho ayyāya rūpaṃ, aho attabhāvamaṇḍanassa phalaṃ: idānissā tuṇḍaṃ passatha, jaṅghā passatha, pāde passatha, sobhati vatassā attabhāvoti keḷiṃ katvā pakkamiṃsu. Puna sakko tassā santikaṃ gantvā "diṭṭhā te sahāyikāti vatvā, "diṭṭhā maṃ upphaṇḍetvā gatā, tattheva maṃ nehīti vutte, taṃ tattheva netvā udake vissajjetvā "diṭṭhā te tāsaṃ sampattīti pucchi. "diṭṭhā me devāti. "tayāpi tattha nibbattanupāyaṃ kātuṃ vaṭṭatīti. "kiṃ karomi devāti. "mayā dinnaṃ ovādaṃ rakkhissasīti. "rakkhissāmi devāti. Athassā pañca sīlāni datvā "appamattā rakkhāhīti vatvā pakkāmi. Sā tato paṭṭhāya sayaṃ matamacchakeyeva pariyesitvā khādati. Sakko katipāhaccayena tassā vīmaṃsanatthāya gantvā vālukāpiṭṭhe matamacchako viya hutvā uttāno nipajji. Sā taṃ disvā "matamacchakoti saññāya aggahesi. Maccho gilanakāle naṅguṭṭhaṃ cālesi. Sā "jīvamacchakoti udake vissajjesi. So thokaṃ vītināmetvā puna tassā purato uttāno hutvā nipajji. Puna sā "matamacchakoti saññāya gahetvā gilanakāle Agganaṅguṭṭhaṃ cālentaṃ disvā "jīvamacchoti vissajjesi. Evaṃ tikkhattuṃ vīmaṃsitvā "sādhukaṃ sīlaṃ rakkhasīti attānaṃ jānāpetvā "ahaṃ tava vīmaṃsanatthāya āgato, sādhukaṃ sīlaṃ rakkhasi, evaṃ rakkhamānā nacirasseva mama santike nibbattissasi, appamattā hohīti vatvā pakkāmi. Sā tato paṭṭhāya sayaṃ matamacchaṃ labhati vā no vā, alabhamānā katipāhaccayeneva sussitvā kālaṃ katvā tassa sīlassa phalena bārāṇasiyaṃ kumbhakārassa dhītā hutvā nibbatti.