Rathasaddaṃ sutvā bhītā garuḷapotakā viraviṃsu. Tesaṃ saddaṃ sutvā sakko mātaliṃ pucchi "ke ete viravantīti. "garuḷapotakā devāti. "kiṃkāraṇāti. "rathasaddaṃ sutvā maraṇabhayenāti. "maṃ ekaṃ nissāya ettako dijo rathavegena vicuṇṇito, mā nassi, nivattehi rathanti. So sindhavasahassassa daṇḍakena saññaṃ datvā rathaṃ nivattesi. Taṃ disvā asurā "jarasakko asurapurato paṭṭhāya palāyanto idāni rathaṃ nivattesi, addhānena upatthambho laddho bhavissatīti nivattitvā āgatamaggeneva asurapuraṃ pavisitvā puna sīsaṃ na ukkhipiṃsu. Sakkopi sujaṃ asurakaññaṃ devanagaraṃ netvā aḍḍhateyyānaṃ accharākoṭīnaṃ jeṭṭhakaṭṭhāne ṭhapesi. Sā sakkaṃ varaṃ yāci "mahārāja mama imasmiṃ devaloke mātāpitaro vā bhātikabhaginiyo vā natthi; yattha yattha gacchasi, tattha tattha maṃ gahetvā gaccheyyāsīti. So "sādhūti tassā paṭiññaṃ adāsi.

Tato paṭṭhāya ca cittapātaliyā pupphitāya, asurā "amhākaṃ dibbapāricchattakassa pupphanakāloti saññāya yuddhatthāya sakkaṃ abhiyujjhitukāmā abhirūhiṃsu. Sakko heṭṭhāsamudde nāgānaṃ ārakkhaṃ adāsi, tato supaṇṇānaṃ, tato kumbhaṇḍānaṃ, tato yakkhānaṃ, tato catunnaṃ mahārājānaṃ, sabbūpari pana devanagaradvāresu vajirahatthā indapaṭimā ṭhapesi. Asurā nāgādayo jinitvā āgatāpi indapaṭimā dūrato disvā "sakko nikkhantoti palāyanti.

"evaṃ mahāli magho māṇavo appamādapaṭipadaṃ paṭipajji; evaṃ appamatto ca panesa evarūpaṃ issariyaṃ patvā dvīsu devalokesu rajjaṃ kāresi, appamādo nāmesa buddhādīhi pasattho, appamādaṃ hi nissāya sabbesaṃpi lokiyalokuttarānaṃ visesānaṃ adhigamo hotīti vatvā imaṃ gāthamāha