"appamādaratoti imaṃ dhammadesanaṃ satthā jetavane viharanto nigamatissattheraṃ ārabbha kathesi.
Ekasmiṃ hi sāvatthito avidūre nigamagāme jātasaṃvaḍḍho eko kulaputto satthu sāsane pabbajitvā laddhūpasampado "nigamatissatthero nāma appiccho santuṭṭho pavivitto āraddhaviriyoti paññāyi. So nibaddhaṃ ñātigāmeyeva piṇḍāya carati. Anāthapiṇḍikādīsu mahādānāni karontesupi, pasenadikosale asadisadānaṃ karontepi, sāvatthiṃ nāgacchati. Bhikkhū "ayaṃ nigamatisso uṭṭhāya samuṭṭhāya ñātisaṃsaṭṭho viharati, anāthapiṇḍikādīsu mahādānāni karontesupi, pasenadikosale asadisadānaṃ karontepi, neva āgacchatīti kathaṃ samuṭṭhāpetvā satthu ārocayiṃsu. Satthā taṃ pakkosāpetvā "saccaṃ kira tvaṃ bhikkhu evaṃ karosīti pucchitvā, "natthi bhante mayhaṃ ñātisaṃsaggo, ahaṃ ete manusse nissāya ajjhoharaṇīyamattaṃ labhāmi, `lūkhe vā paṇīte vā yāpanamatte laddhe, puna kiṃ āhārapariyesanenāti nāgacchāmi, ñātīhi pana me saṃsaggo nāma natthi bhanteti vutte, pakatiyāpi tassa ajjhāsayaṃ jānanto "sādhu sādhu bhikkhūti sādhukāraṃ datvā "anacchariyaṃ kho panetaṃ bhikkhu, yaṃ tvaṃ mādisaṃ ācariyaṃ labhitvā appiccho ahosi; ayañhi appicchatā nāma mama tanti mama paveṇīti vatvā bhikkhūhi yācito atītaṃ āhari:
atīte himavante gaṅgātīre ekasmiṃ udumbaravane anekasahassā suvakā vasiṃsu. Tattha eko suvarājā attano nivāsanarukkhassa phalesu khīṇesu, yadeva avasiṭṭhaṃ hoti aṅkuro vā pattaṃ vā taco vā, taṃ khāditvā gaṅgāyaṃ pānīyaṃ pivitvā paramappiccho santuṭṭho hutvā aññattha na gacchati. Tassa appicchasantuṭṭhabhāvaguṇena sakkassa bhavanaṃ kampi. Sakko āvajjamāno taṃ disvā tassa vīmaṃsanatthaṃ attano ānubhāvena taṃ rukkhaṃ sukkhāpesi. Rukkho obhaggā khāṇumattova hutvā Chiddāvachiddo, vāte paharante, ākoṭito viya saddaṃ nicchārento aṭṭhāsi. Tassa chiddehi cuṇṇāni nikkhamanti, suvarājā tāni khāditvā gaṅgāyaṃ pānīyaṃ pivitvā aññattha agantvā vātātapaṃ agaṇetvā udumbarakhāṇumatthake nisīdi. Sakko tassa paramappicchabhāvaṃ ñatvā "mittadhammaguṇaṃ kathāpetvā varamassa datvā udumbaraṃ amataphalaṃ karitvā āgamissāmīti eko haṃsarājā hutvā sujaṃ asurakaññaṃ purato katvā taṃ udumbaravanaṃ gantvā avidūre ekassa rukkhassa sākhāya nisīditvā tena saddhiṃ kathento imaṃ gāthamāha