Tattha abhabbo parihānāyāti: so evarūpo bhikkhu samathavipassanādhammehi vā maggaphalehi vā parihānāya abhabbo, nāpi pattehi parihāyati na appattāni na pāpuṇāti. Nibbānasseva santiketi: kilesaparinibbānassāpi anupādāparinibbānassāpi santikeyevāti.

Gāthāpariyosāne nigamatissatthero saha paṭisambhidāhi arahattaṃ pāpuṇi. Aññepi bahū sotāpannādayo ahesuṃ, mahājanassa mahapphalā desanā jātāti.

Nigamavāsitissattheravatthu.

Appamādavaggavaṇṇanā niṭṭhitā.