Tesu evaṃ katikaṃ katvā viharantesu, ekadivasaṃ sā upāsikā sappiphāṇitādīni gāhāpetvā dāsakammakarādīhi parivutā sāyaṇhasamaye taṃ vihāraṃ gantvā vihāramajjhe bhikkhū adisvā "kahaṃ nu kho ayyā gatāti purise pucchitvā, "attano rattiṭṭhānadivāṭṭhānesu nisinnā bhavissanti ayyeti vutte, "kiṃ nu kho katvā daṭṭhuṃ sakkhissāmīti āha. Atha naṃ bhikkhusaṅghassa katikavattajānanamanussā āhaṃsu "gaṇḍiyā pahatāya sannipatissanti ayyeti. Sā gaṇḍiṃ paharāpesi. Bhikkhū gaṇḍisaddaṃ sutvā "kassaci aphāsukaṃ bhavissatīti sakasakaṭṭhānehi nikkhamitvā vihāramajjhe sannipatiṃsu. Dvepi janā ekamaggenāgatā nāma natthi. Upāsikā ekekaṭṭhānato ekamekameva āgacchantaṃ disvā "mama puttehi aññamaññaṃ kalaho kato bhavissatīti cintetvā bhikkhusaṅghaṃ vanditvā pucchi "kalahaṃ nu kho bhante karitthāti. "na karoma mahāupāsiketi. "sace vo bhante kalaho natthi, atha kasmā, yathā amhākaṃ gehaṃ āgacchantā sabbe ekato āgacchatha; evaṃ anāgantvā, ekekaṭṭhānato ekekāva āgatāti. "mahāupāsike ekekasmiṃ ṭhāne nisīditvā samaṇadhammaṃ karimhāti. "ko esa tātā samaṇadhammo nāmāti. "dvattiṃsākārasajjhāyaṃ karoma attabhāve khayavayaṃ paṭṭhapema mahāupāsiketi. "kiṃ pana bhante dvattiṃsākāre sajjhāyaṃ kātuṃ attabhāve ca khayavayaṃ paṭṭhapetuṃ tumhākameva vaṭṭati udāhu amhākaṃpīti. "kassaci bhagavatā avārito esa dhammo mahāupāsiketi. "tenahi mayhaṃpi dvattiṃsākāraṃ detha attabhāve ca Khayavayaṃ paṭṭhapanaṃ ācikkhathāti. "tenahi uggaṇha mahāupāsiketi sabbaṃ uggaṇhāpesuṃ. Sā tato paṭṭhāya dvattiṃsākāre sajjhāyaṃ katvā attani khayavayaṃ paṭṭhapetvā tehi bhikkhūhi puretarameva tayo magge tīṇi ca phalāni pāpuṇi. Maggeneva cassā catasso paṭisambhidā lokiyaabhiññā ca āgamiṃsu. Sā maggaphalasukhato uṭṭhāya dibbacakkhunā oloketvā "kadā nu kho mama puttehi ayaṃ dhammo adhigatoti upadhārentī "sabbepime sarāgā sadosā samohā, jhānavipassanāmattaṃ tesaṃ natthi; kinnu kho mayhaṃ puttānaṃ arahattassa upanissayo atthi natthīti āvajjetvā "atthīti disvā "senāsanasappāyaṃ nu kho atthi natthīti āvajjetvā senāsanasappāyaṃpi disvā "puggalasappāyaṃ nu kho na labhantīti āvajjetvā puggalasappāyaṃpi disvā "āhārasappāyaṃ nu kho na labhantīti upadhārentī "āhārasappāyaṃ nesaṃ natthīti disvā tato paṭṭhāya nānāvidhaṃ yāguṃ anekappakāraṃ khajjakaṃ nānaggarasañca bhojanaṃ sampādetvā bhikkhū nisīdāpetvā dakkhiṇodakaṃ datvā "bhante tumhākaṃ yaṃ yaṃ ruccati, taṃ taṃ gahetvā paribhuñjathāti niyyādesi. Te yathāruciyā yāguādīni gahetvā paribhuñjanti. Tesaṃ sappāyāhāraṃ labhantānaṃ cittaṃ ekaggaṃ ahosi. Te ekaggena cittena vipassanaṃ vaḍḍhetvā nacirasseva saha paṭisambhidāhi arahattaṃ patvā cintayiṃsu "aho mahāupāsikā amhākaṃ patiṭṭhā jātā; sace mayaṃ sappāyāhāraṃ na labhimhā, na no maggaphalapaṭivedho abhavissa; idāni vutthavassā pavāretvā satthu santikaṃ gamissāmāti. Te "satthāraṃ daṭṭhukāmamhāti mahāupāsikaṃ āpucchiṃsu. Mahāupāsikā "sādhu ayyāti te anugantvā "punapi bhante amhe olokeyyāthāti bahūni piyavacanāni vatvā paṭinivatti. Tepi kho bhikkhū sāvatthiṃ gantvā satthāraṃ vanditvā ekamantaṃ nisinnā "kacci bhikkhave khamanīyaṃ, kacci yāpanīyaṃ, na ca piṇḍakena kilamitthāti vuttā "khamanīyaṃ bhante, yāpanīyaṃ bhante, piṇḍakena pana neva kilamimhā; amhākaṃ hi mātikamātā nāmekā upāsikā cittavāraṃ ñatvā `aho vata no evarūpannāma āhāraṃ paṭiyādeyyāti cintite, yathācinatitaṃ āhāraṃ paṭiyādetvā adāsīti tassā guṇakathaṃ kathayiṃsu.