Asobhanaṃpi cintenti; sacāhaṃ kiñci ayuttaṃ cintessāmi, saha bhaṇḍakena coraṃ cūḷāya gaṇhantī viya maṃ vippakāraṃ pāpessatīti cintetvā āgatomhīti. "bhikkhu tattheva tayā vasituṃ vaṭṭatīti. "na sakkomi bhante, nāhaṃ tattha vasissāmīti. "tenahi tvaṃ bhikkhu ekameva rakkhituṃ sakkhissasīti. "kiṃ bhanteti. "tava cittameva rakkha, cittaṃ nāmetaṃ durakkhaṃ, attano cittameva niggaṇha, mā aññaṃ kiñci cintayi, cittaṃ nāmetaṃ dunniggahanti vatvā imaṃ gāthamāha

"dunniggahassa lahuno yattha kāmanipātino

cittassa damatho sādhu, cittaṃ dantaṃ sukhāvahanti.

Tattha "cittaṃ nāmetaṃ dukkhena niggayhatīti dunniggahaṃ, lahuṃ uppajjati ca nirujjhati cāti lahu, tassa dunniggahassa lahuno. Yattha kāmanipātinoti: yattha katthacideva nipātanasīlassa. Etaṃ hi labhitabbaṭṭhānaṃ vā alabhitabbaṭṭhānaṃ vā yuttaṭṭhānaṃ vā ayuttaṭṭhānaṃ vā na jānāti, neva jātiṃ oloketi na gottaṃ na vayaṃ; yattha yattheva icchati, tattha tattheva nipatatīti yattha kāmanipātīti vuccati, tassa evarūpassa cittassa damatho sādhu catūhi ariyamaggehi dantabhāvo yathā nibbisevanaṃ hoti tathā katabhāvo sādhu. Kiṃkāraṇā? idaṃ hi cittaṃ dantaṃ sukhāvahaṃ dantaṃ nibbisevanaṃ kataṃ maggaphalasukhaṃ paramatthanibbānasukhañca āvahatīti.