@4 Ma. pariggahitassa 5 cha.Ma. nayena 6 cha.Ma. avuttampi Saddhiṃ ekato bhāvanatthaṃ idha pakkhipitvā matthaluṅgapañcakaṃ aḍḍhamāsaṃ, tato pañcakacatukkampi aḍḍhamāsaṃ, tato medacchakkaṃ aḍḍhamāsaṃ, tato medacchakkena saha taṃ pañcakacatukkampi aḍḍhamāsaṃ, atha muttacchakkaṃ aḍmāsaṃ, tato sabbameva dvattiṃsākāraṃ aḍḍhamāsanti evaṃ cha māse vaṇṇasaṇṭhānadisokāsaparicchedato vavatthapentena bhāvetabbaṃ. Evaṃ majjhimapaññapuggalaṃ sandhāya vuttaṃ. Mandapaññena tu yāvajīvaṃ bhāvetabbaṃ, tikkhapaññassa nacireneva bhāvanā sampajjatīti.

Etthāha "kathampanāyamimaṃ dvattiṃsākāraṃ vaṇṇādito vavatthapetī"ti. Vuccate ayañhi "atthi imasmiṃ kāye kesā"ti evamādinā nayena tacapañcakādi- vibhāgato dvattiṃsākāraṃ bhāvento kese tāva vaṇṇato kāḷakāti vavatthapeti, yādisakā vānena diṭṭhā honti. Saṇṭhānato dīghāvaṭṭakā tulādaṇḍamivāti vavatthapeti. Disato pana yasmā imasmiṃ kāye nābhito uddhaṃ uparimadisā adho heṭṭhimāti vuccati, tasmā imassa kāyassa uparimadisāya jātāti vavatthapeti. Okāsato nalāṭantakaṇṇacūḷikagalavāṭakaparicchinne sīsacamme jātāti. Tattha yathā vammikamatthake jātāni kuṇṭhatiṇāni na jānanti "mayaṃ vammikamatthake jātānī"ti, napi vammikamatthako jānāti "mayi kuṇṭhatiṇāni jātānī"ti, evameva na kesā jānanti "mayaṃ sīsacamme jātā"ti napi sīsacammaṃ jānāti "mayi kesā jātā"ti. Ābhogapaccavekkhaṇavirahitā hi ete dhammā acetanā abyākatā suññā paramaduggandhajegucchapaṭikkūlā, na satto na puggaloti vavatthapeti. Paricchedatoti dubbidho paricchedo sabhāgavisabhāgavasena. Tattha kesā heṭṭhā patiṭṭhitacammatalena tattha vīhaggamattaṃ pavisitvā patiṭṭhitena attano mūlatalena vā upari ākāsena tiriyaṃ aññamaññena paricchinnāti evaṃ sabhāgaparicchedato, kesā na avasesaekattiṃsākārā, avasesaekattiṃsākārā na kesāti evaṃ visabhāgaparicchedato ca vavatthapeti. Evantāva kese vaṇṇādito vavatthapeti.