"dūraṅgamaṃ ekacaraṃ asarīraṃ guhāsayaṃ

ye cittaṃ saññamessanti, mokkhanti mārabandhanāti.

Tattha dūraṅgamanti: cittassa hi makkaṭasuttamattakaṃpi puratthimādidisābhāgena gamanāgamanaṃ nāma natthi, dūre santaṃpi ārammaṇaṃ sampaṭicchatīti dūraṅgamaṃ nāma jātaṃ. Sattaṭṭhacittāni pana ekato kaṇṇikabaddhāni ekakkhaṇe uppajjituṃ samatthāni nāma natthi, uppattikāle ekekameva cittaṃ uppajjati, tasmiṃ niruddhe puna ekekameva uppajjatīti ekacaraṃ nāma jātaṃ. Cittassa sarīrasaṇṭhānaṃ vā nīlādipakāro vaṇṇabhedo vā natthīti asarīraṃ nāma jātaṃ. Guhā nāma Catumahābhūtaguhā, idañca hadayarūpaṃ nissāya pavattatīti guhāsayaṃ nāma jātaṃ. Ye cittanti: ye keci purisā vā itthī vā gahaṭṭhā vā pabbajitā vā anuppajjanakakilesassa uppajjituṃ adentā satisammosena uppannakilesaṃ pajahantā cittaṃ saññamessanti saññataṃ avikkhittaṃ karissanti. Mokkhanti mārabandhanāti: sabbe te kilesabandhanābhāvena mārabandhanasaṅkhātā tebhūmikavaṭṭā muccissantīti.

Desanāpariyosāne bhāgineyyasaṅgharakkhitatthero sotāpattiphalaṃ pāpuṇi, aññepi bahū sotāpannādayo jātā, mahājanassa sātthikā desanā ahosīti.