Buddhānañca nāma dve vāre lokavolokanaṃ avijahitaṃ hoti: paccūsakāle lokaṃ volokentā cakkavāḷamukhavaṭṭito paṭṭhāya gandhakuṭiabhimukhaṃ ñāṇaṃ katvā olokenti, sāyaṃ olokentā gandhakuṭito paṭṭhāya bāhirābhimukhaṃ ñāṇaṃ katvā olokenti. Tasmiṃ pana samaye bhagavato ñāṇajālassa anto pūtigattatissatthero paññāyi. Satthā tissassa bhikkhuno arahattassa upanissayaṃ disvā "ayaṃ saddhivihārikādīhi chaḍḍito, idānissa maṃ ṭhapetvā aññaṃ paṭisaraṇaṃ natthīti gandhakuṭito nikkhamitvā vihāracārikaṃ caramāno viya aggisālaṃ gantvā ukkhaliṃ dhovitvā udakaṃ datvā uddhanaṃ āropetvā udakassa tattabhāvaṃ āgamayamāno aggisālāyameva aṭṭhāsi; tattabhāvaṃ jānitvā gantvā tissabhikkhuno nipannamañcakakoṭiyaṃ gaṇhi. Tadā bhikkhū "apetha bhante, mayaṃ gaṇhissāmāti mañcakaṃ gahetvā aggisālaṃ ānayiṃsu. Satthā ambaṇakaṃ āharāpetvā uṇhodakaṃ āsiñcitvā tehi bhikkhūhi tassa pārupanaṃ gāhāpetvā uṇhodakena maddāpetvā ātape vissajjāpesi. Athassa santike ṭhatvā taṃ sarīraṃ uṇhodakena temetvā tassa sarīraṃ ghaṃsitvā nahāpesi. Tassa nahānapariyosāne pārupanaṃ sukkhi. Atha naṃ taṃ nivāsāpetvā nivatthakāsāvaṃ udakena maddāpetvā ātape vissajjāpesi. Athassa gatte udake chinnamatte, taṃ sukkhi.

So ekaṃ kāsāvaṃ nivāsetvā ekaṃ pārupitvā sallahukasarīro ekaggacitto hutvā mañcake nipajji. Satthā tassa ussīsake ṭhatvā "bhikkhu ayaṃ tava kāyo apetaviññāṇo nirupakāro hutvā kaliṅgaraṃ viya paṭhaviyaṃ sayissatīti vatvā imaṃ gāthamāha

"aciraṃ vatayaṃ kāyo paṭhaviṃ adhisessati

chuḍḍo apetaviññāṇo, niratthaṃva kaliṅgaranti.