Athekadivasaṃ rājā uparipāsāde ṭhito antaravīthiṃ olokayamāno "anāthapiṇḍikassa cūḷaanāthapiṇḍikassa visākhāya suppavāsāyāti etesaṃ gehe bhattakiccatthāya gacchante anekasahasse bhikkhū disvā "kahaṃ ayyā gacchantīti pucchitvā, "deva anāthapiṇḍikassa gehe niccabhattasalākabhattagilānabhattādīnaṃ atthāya devasikaṃ dve bhikkhusahassāni gacchanti, cūḷaanāthapiṇḍikassa gehaṃ pañcasatā bhikkhū niccaṃ gacchanti, tathā visākhāya, tathā suppavāsāyāti vutte, sayaṃpi bhikkhusaṅghaṃ upaṭṭhahitukāmo vihāraṃ gantvā bhikkhusahassena saddhiṃ satthāraṃ nimantetvā sattāhaṃ sahatthā dānaṃ datvā sattame divase Satthāraṃ vanditvā "bhante pañcahi me bhikkhusatehi saddhiṃ nibaddhaṃ bhikkhaṃ gaṇhathāti āha. "mahārāja buddhā nāma ekaṭṭhāne nibaddhaṃ bhikkhaṃ na gaṇhanti, bahū buddhānaṃ āgamanaṃ paccāsiṃsantīti. "tenahi ekaṃ bhikkhuṃ nibaddhaṃ pesethāti. Satthā ānandattherassa bhāramakāsi. Rājā "bhikkhusaṅghe āgate, pattaṃ gahetvā ime nāma parivisantūti avicāretvā sattāhaṃ sayameva parivisitvā aṭṭhame divase vikkhitto papañcaṃ akāsi. Rājakule ca nāma anāṇattā āsanāni paññāpetvā bhikkhū nisīdāpetvā parivisituṃ na labhanti. Bhikkhū "na mayaṃ idha ṭhātuṃ sakkhissāmāti bahū pakkamiṃsu. Rājā dutiyadivasepi pamajji. Dutiyadivasepi bahū pakkamiṃsu. Tatiyadivasepi pamajji. Tadā ānandattheraṃ ekakameva ṭhapetvā avasesā pakkamiṃsu.
Puññavantā nāma kāraṇavasikā honti kulānaṃ pasādaṃ rakkhanti. Tathāgatassa ca "sārīputtatthero mahāmoggallānattheroti dve aggasāvakā, "khemā uppalavaṇṇāti dve aggasāvikā, upāsakesu "citto gahapati hatthako āḷavakoti dve aggasāvakā, upāsikāsu "veḷukaṇṭakī nandamātā khujjuttarāti dve aggasāvikā; iti ime aṭṭha jane ādiṃ katvā ṭhānantarappattā sabbepi sāvakā ekadesena dasannaṃ pāramīnaṃ pūritattā mahāpuññā abhinīhārasampannā.
Ānandattheropi kappasatasahassapūritapāramī abhinīhārasampanno mahāpuñño attano kāraṇavasikatāya kulassa pasādaṃ rakkhanto aṭṭhāsi. Taṃ ekakameva nisīdāpetvā parivisiṃsu. Rājā bhikkhūnaṃ Gatakāle āgantvā khādanīyabhojanīyāni tatheva ṭhitāni disvā "kiṃ ayyā nāgamiṃsūti pucchitvā "ānandatthero ekakova āgato devāti sutvā "addhā ettakamme chedanamakaṃsūti bhikkhūnaṃ kuddho satthu santikaṃ gantvā "bhante mayā pañcannaṃ bhikkhusatānaṃ bhikkhā paṭiyattā, ānandatthero kira ekakova āgato, paṭiyattabhikkhā tatheva ṭhitā, pañcasatā bhikkhū mama gehe saññaṃ na kariṃsu; kinnu kho kāraṇanti āha. Satthā bhikkhūnaṃ dosaṃ avatvā "mahārāja mama sāvakānaṃ tumhehi saddhiṃ vissāso natthi, tena na gatā bhavissantīti vatvā kulānaṃ anupagamanakāraṇañca upagamanakāraṇañca pakāsento bhikkhū āmantetvā imaṃ suttamāha