Hutvā paññāyiṃsu, tadā "ekameva sāmi rathasīsaṃ paññāyatīti āha. Bandhulo "tenahi imā rasmiyo gaṇhāti tassā rasmiyo datvā rathe ṭhitova dhanuṃ āropesi. Rathacakkaṃ yāva nābhito paṭhaviṃ pāvisi. Licchavino taṃ ṭhānaṃ disvā na nivattiṃsu. Itaro thokaṃ gantvā jiyaṃ pothesi. Asanisaddo viya ahosi. Te tatopi na nivattiṃsu, anubandhantā gacchanteva. Bandhulo rathe ṭhitakova ekaṃ saraṃ khipi. So pañcannaṃ rathasatānaṃ rathasīse chiddaṃ katvā pañca rājasatāni parikarabandhanaṭṭhāne vinivijjhitvā paṭhaviyaṃ pāvisi. Te attano viddhabhāvaṃ ajānitvā "tiṭṭha re, tiṭṭha reti vadantā anubandhiṃsuyeva. Bandhulo rathaṃ ṭhapetvā "tumhe matakā, matakehi saddhiṃ mayhaṃ yuddhaṃ nāma natthīti āha. "matakā nāma amhāsadisā na hontīti. "tenahi sabbapacchimassa parikaraṃ mocethāti. Te mocayiṃsu. So muttamatteyeva maritvā pati. Atha ne "sabbepi tumhe evarūpā, attano attano gharāni gantvā saṃvidhātabbaṃ saṃvidahitvā puttadāraṃ anusāsitvā sannāhaṃ mocethāti āha. Te tathā katvā sabbepi jīvitakkhayaṃ pattā. Bandhulopi mallikaṃ sāvatthiṃ ānesi. Sā soḷasakkhattuṃ yamake yamake putte vijāyi. Sabbepi sūrā thāmasampannā ahesuṃ. Sabbasippānaṃ nipphattiṃ pāpuṇiṃsu. Ekekassa purisasahassaṃ parivāro ahosi. Pitarā saddhiṃ rājanivesanaṃ gacchantehi teheva rājaṅgaṇaṃ paripūri.
Athekadivasaṃ vinicchaye kuṭaṭṭaparājitā manussā bandhulaṃ āgacchantaṃ
Disvā mahāviravaṃ viravantā vinicchayamaccānaṃ kuṭaṭṭakaraṇaṃ tassa ārocesuṃ. So vinicchayaṃ gantvā taṃ aṭṭaṃ tīretvā sāmikameva sāmikaṃ akāsi. Mahājano mahāsaddena sādhukāraṃ pavattesi. Taṃ sutvā rājā "kiṃ idanti pucchitvā tamatthaṃ sutvā tusitvā sabbepi te amacce harāpetvā bandhulasseva vinicchayaṃ niyyādesi. So tato paṭṭhāya sammā vinicchayi. Tato porāṇakavinicchayikā amaccā lañcaṃ alabhantā appalābhā hutvā "bandhulo rajjaṃ patthetīti rājakule paribhindiṃsu. Rājā tesaṃ kathaṃ gahetvā cittaṃ niggahetuṃ nāsakkhi, "imasmiṃ idheva ghātiyamāne, garahā me uppajjissatīti puna cintetvā payuttapurisehi paccantaṃ paharāpetvā bandhulaṃ pakkosāpetvā "paccanto kira kupito, tvaṃ puttehi saddhiṃ gantvā core gaṇhāti pahiṇitvā "etthevassa dvattiṃsāya puttehi saha sīsaṃ chinditvā āharathāti tena saddhiṃ aññepi samatthe mahāyodhe pesesi. Tasmiṃ paccantaṃ gacchanteyeva, "senāpati kirāgacchatīti payuttacorā palāyiṃsu. So taṃ padesaṃ āvāsāpetvā saṇṭhāpetvā nivatti. Athassa nagarato avidūre ṭhāne te yodhā saddhiṃ puttehi sīsaṃ chindiṃsu.