Bhāgineyyassa dīghakārāyanassa nāma senāpatiṭṭhānaṃ adāsi. So pana "mātulo me iminā māritoti rañño otāraṃ gavesanto vicarati. Rājā kira niraparādhassa bandhulassa māritakālato paṭṭhāya vippaṭisārī hutvā cittassādaṃ na labhati rajjasukhaṃ nānubhoti.
Tadā satthā sākiyānaṃ medaḷupaṃ nāma nigamaṃ nissāya viharati. Rājā tattha gantvā ārāmato avidūre khandhāvāraṃ nivāsetvā mahantena parivārena "satthāraṃ vandissāmīti vihāraṃ gantvā pañca rājakakudhabhaṇḍāni dīghakārāyanassa datvā ekakova gandhakuṭiṃ pāvisi. Sabbaṃ dhammacetiyasuttaniyāmena veditabbaṃ. Tasmiṃ gandhakuṭiṃ paviṭṭhe, dīghakārāyano tāni rājakakudhabhaṇḍāni gahetvā viḍūḍabhaṃ rājānaṃ katvā rañño ekaṃ assaṃ ekañca upaṭṭhānakārikaṃ mātugāmaṃ ṭhapetvā nivattetvā sāvatthiṃ agamāsi. Rājā satthārā saddhiṃ piyakathaṃ kathetvā nikkhanto senaṃ adisvā taṃ mātugāmaṃ pucchitvā taṃ pavattiṃ sutvā "bhāgineyyaṃ ādāya gantvā viḍūḍabhaṃ gahessāmīti rājagahanagaraṃ gacchanto vikāle dvāresu pidahitesu, nagaraṃ patvā ekissā sālāya nipajjitvā vātātapakilanto rattibhāge tattheva kālamakāsi. Vibhātāya rattiyā, "deva kosalanarinda anātho jātosīti vilapantiyā tassā itthiyā saddaṃ sutvā rañño ārocesuṃ. So mātulassa mahantena sakkārena sarīrakiccaṃ kāresi.
Viḍūḍabhopi rajjaṃ labhitvā taṃ veraṃ saritvā "sabbepi sākiye
Māressāmīti mahatiyā senāya nikkhami. Taṃ divasaṃ satthā paccūsakāle lokaṃ olokento ñātasaṅghavināsaṃ disvā "ñātisaṅgahaṃ kātuṃ vaṭṭatīti cintetvā pubbaṇhasamaye piṇḍāya caritvā piṇḍapātapaṭikkanto gandhakuṭiyaṃ sīhaseyyaṃ kappetvā sāyaṇhasamaye ākāsena gantvā kapilavatthusāmante kabaracchāye rukkhamūle nisīdi. Tato viḍūḍabhassa rajjasīmāyaṃ mahanto saṇḍacchāyo nigrodharukkho atthi. Viḍūḍabho satthāraṃ disvā upasaṅkamitvā vanditvā "bhante kiṃkāraṇā evarūpāya uṇhavelāya imasmiṃ kabaracchāye rukkhamūle nisinnattha, etasmiṃ saṇḍacchāye nigrodhamūle nisīdatha bhanteti vatvā, "hotu mahārāja, ñātakānaṃ chāyā nāma sītalāti vutte, "ñātakānaṃ rakkhaṇatthāya satthā āgato bhavissatīti cintetvā satthāraṃ vanditvā nivattitvā sāvatthimeva paccāgami. Satthāpi uppatitvā jetavanameva gato. Rājā sākiyānaṃ dosaṃ saritvā dutiyampi nikkhamitvā tattheva satthāraṃ passitvā puna nivatti. Tatiyavārepi nikkhamitvā tattheva satthāraṃ passitvā nivatti. Catutthavāre pana tasmiṃ nikkhante, satthā sākiyānaṃ pubbakammaṃ oloketvā tesaṃ nadiyaṃ visapakkhipanapāpakammassa appaṭibāhiyabhāvaṃ ñatvā catutthavāre nāgamāsi. Viḍūḍabho "sākiye ghātessāmīti mahantena balena nikkhami.