Sammāsambuddhassa pana ñātakā asattaghātakā nāma marantāpi paresaṃ jīvitaṃ na voropenti. Te cintayiṃsu "mayaṃ sikkhitahatthā katupāsanā mahissāsā, na kho pana sakkā amhehi paraṃ jīvitā Voropetuṃ, attano kammaṃ dassetvā palāpessāmāti. Te katasannāhā nikkhamitvā yuddhaṃ ārabhiṃsu. Tehi khittā sarā viḍūḍabhassa purisānaṃ antarantarena gacchanti, phalakantarakaṇṇacchiddantarādīhi nikkhamanti. Viḍūḍabho disvā "nanu bhaṇe sākiyā `asattaghātakamhāti vadanti, atha ca pana me purise nāsentīti. Atha naṃ eko puriso āha "kiṃ sāmi nivattitvā olokesīti. "sākiyā me purise nāsentīti. "tumhākaṃ koci puriso mato nāma natthi, iṅgha ne gaṇāpethāti. Gaṇāpento ekassapi khayaṃ na passi. So tato nivattitvā "ye ye bhaṇe `sākiyamhāti bhaṇanti sabbe māretha; mātāmahassa pana me mahānāmasakkassa santike ṭhitānaṃ jīvitaṃ dethāti āha. Sākiyā gahetabbaggahaṇaṃ apassantā ekacce tiṇaṃ ḍaṃsitvā ekacce naḷaṃ gahetvā aṭṭhaṃsu, "tumhe sākiyā noti pucchitā, yasmā te marantāpi musāvādaṃ na bhaṇanti; tasmā tiṇaṃ ḍaṃsitvā ṭhitā "no sāko, tiṇanti vadanti, naḷaṃ gahetvā ṭhitā "no sāko, naḷoti vadanti. Te ca mahānāmassa santike ṭhitā ca jīvitaṃ labhiṃsu. Tesu tiṇaṃ ḍaṃsitvā ṭhitā tiṇasākiyā nāma, naḷaṃ gahetvā ṭhitā naḷasākiyā nāma jātā. Avasese khīrapakepi dārake avissajjetvā ghātāpento lohitanadiṃ pavattetvā tesaṃ galalohitena phalakaṃ dhovāpesi. Evaṃ sākiyavaṃso viḍūḍabhena upacchinno. So mahānāmasakkaṃ gāhāpetvā nivatto pātarāsavelāya "pātarāsaṃ karissāmāti ekasmiṃ ṭhāne otaritvā, bhojane upanīte, "ekato bhuñjissāmāti ayyakaṃ Pakkosāpesi. Khattiyā pana jīvitaṃ cajantāpi dāsīputtena saddhiṃ na bhuñjanti; tasmā mahānāmo ekaṃ saraṃ oloketvā "kiliṭṭhagattomhi, nahāyissāmi tātāti āha. "sādhu ayyaka nahāyathāti. So "ayaṃ maṃ ekato abhuñjantaṃ ghātessati, sayameva me mataṃ seyyoti kese muñcitvā agge gaṇṭhiṃ katvā kesesu pādaṅguṭṭhake pavesetvā udake nimujji. Tassa guṇatejena nāgabhavanaṃ uṇhākāraṃ dassesi. Nāgarājā "kinnu khoti upadhārento disvā tassa santikaṃ āgantvā phaṇe nisīdāpetvā nāgabhavanaṃ pavesesi. So dvādasavassāni tattheva vasi. Viḍūḍabhopi "mayhaṃ ayyako idāni āgamissatīti āgamayamānova nisīdi; tasmiṃ aticirāyante, sare vicināpetvā dīpālokena purisabbhantarānipi oloketvā adisvā "gato bhavissatīti pakkāmi. So rattibhāge aciravatiṃ patvā khandhāvāraṃ nivesesi. Ekacce antonadiyaṃ vālikāpuline nipajjiṃsu, ekacce bahi thale, anto nipannesupi pubbe akatapāpakammā atthi, bahi nipannesupi pubbe katapāpakammā atthi; tesaṃ nipannaṭṭhānesu kipillikā uṭṭhahiṃsu. Te "mayhaṃ nipannaṭṭhāne kipillikā, mayhaṃ nipannaṭṭhāne kipillikāti uṭṭhahitvā, akatapāpakammā uttaritvā thale nipajjiṃsu, katapāpakammā otaritvā vālikāpuline nipajjiṃsu. Tasmiṃ khaṇe mahāmegho uṭṭhahitvā ghanakarakavassaṃ vassi. Nadiyā ogho āgantvā viḍūḍabhaṃ saddhiṃ parisāya samuddameva pāpesi. Sabbe tattha macchakacchapabhakkhā ahesuṃ.