Punadivase bhikkhū gāmaṃ paviṭṭhā āsanasālaṃ appaṭijaggitaṃ āsanāni appaññattāni pānīyaṃ anupaṭṭhapitaṃ disvā "kahaṃ patipūjikāti āhaṃsu. "bhante kahaṃ tumhe taṃ dakkhissatha, hīyo ayyesu bhuñjitvā gatesu, sāyaṇhasamaye matāti. Taṃ sutvā puthujjanabhikkhū etissā upakāraṃ sarantā assūni sandhāretuṃ nāsakkhiṃsu, khīṇāsavānaṃ dhammasaṃvego udapādi. Te bhattakiccaṃ katvā vihāraṃ gantvā satthāraṃ vanditvā pucchiṃsu "bhante patipūjikā nāma upāsikā uṭṭhāya samuṭṭhāya nānappakārāni puññāni katvā sāmikameva paṭṭhesi, sā idāni matā, kahaṃ nu kho nibbattāti. "attano sāmikasseva santike bhikkhaveti. "natthi bhante sāmikassa santiketi. "na sā bhikkhave etaṃ sāmikaṃ paṭṭhesi, tāvatiṃsabhavane tassā mālābhāridevaputto nāma sāmiko, sā tassa pupphapilandhanaṭṭhānato cavitvā puna gantvā tasseva santike nibbattāti. "evaṃ kira bhanteti. "āma bhikkhaveti. "aho parittaṃ bhante sattānaṃ jīvitaṃ, pātova amhe parivisitvā sāyaṃ uppannabyādhinā matāti. Satthā "āma bhikkhave parittaṃ sattānaṃ jīvitaṃ nāma, tenevime satte vatthukāmehi ceva kilesakāmehi ca atitte eva antako attano vase vattetvā kandante paridevante Gahetvā gacchatīti vatvā imaṃ gāthamāha

"pupphāni heva pacinantaṃ byāsattamanasaṃ naraṃ

atittaṃyeva kāmesu antako kurute vasanti.

Tattha "pupphāni heva pacinantanti: pupphārāme mālākāro nānāpupphāni viya attabhāvappaṭibaddhāni ceva upakaraṇappaṭibaddhāni ca kāmaguṇapupphāni ocinantameva. Byāsattamanasaṃ naranti: asampattesu patthanāvasena sampattesu gedhavasena vividhenākārena āsattacittaṃ. Atittaṃyeva kāmesūti: vatthukāmakilesakāmesu pariyesanenapi paṭilābhenapi paribhogenapi nidhānenapi atittaṃ eva samānaṃ. Antako kurute vasanti maraṇasaṅkhāto antako kandantaṃ paridevantaṃ gahetvā gacchanto attano vasaṃ pāpetīti attho.