"yathāpi puppharāsimhāti imaṃ dhammadesanaṃ satthā sāvatthiṃ upanissāya pubbārāme viharanto visākhaṃ upāsikaṃ ārabbha kathesi.
Sā kira aṅgaraṭṭhe bhaddiyanagare meṇḍakaseṭṭhiputtassa dhanañjayaseṭṭhino aggamahesiyā sumanādeviyā kucchismiṃ nibbatti. Tassā sattavassikakāle satthā selabrāhmaṇādīnaṃ bodhaneyyabandhavānaṃ upanissayasampattiṃ disvā mahābhikkhusaṅghaparivāro cārikaṃ caramāno Taṃ nagaraṃ pāpuṇi. Tasmiñca samaye meṇḍako gahapati tasmiṃ nagare pañcannaṃ mahāpuññānaṃ jeṭṭhako hutvā seṭṭhiṭṭhānaṃ kāreti. Pañca mahāpuññā nāma "meṇḍako seṭṭhī, candapadumā nāma tasseva jeṭṭhakabhariyā, tasseva jeṭṭhakaputto dhanañjayo nāma, tassa bhariyā sumanādevī nāma, meṇḍakaseṭṭhissa dāso puṇṇo nāmāti. Na kevalañca meṇḍakaseṭṭhīyeva, bimbisārarañño pana vijite pañca amitabhogā nāma ahesuṃ "jotiyo, jaṭilo, meṇḍako, puṇṇako, kākavalliyoti. Tesu ayaṃ meṇḍakaseṭṭhī dasabalassa attano nagaraṃ sampattabhāvaṃ ñatvā puttassa dhanañjayaseṭṭhino dhītaraṃ visākhaṃ dārikaṃ pakkosāpetvā āha "amma tuyhaṃpi maṅgalaṃ, amhākaṃpi maṅgalaṃ; tava parivārehi pañcahi dārikāsatehi saddhiṃ pañca rathasatāni āruyha pañcahi dāsīsatehi parivutā dasabalassa paccuggamanaṃ karohīti. Sā "sādhūti paṭissuṇitvā tathā akāsi. Kāraṇākāraṇesu pana kusalattā yāvatikā yānassa bhūmi, yānena gantvā yānā paccorohitvā pattikāva satthāraṃ upasaṅkamitvā vanditvā ekamantaṃ aṭṭhāsi. Athassā pubbacariyavasena satthā dhammaṃ desesi. Sā desanāvasāne pañcahi dārikāsatehi saddhiṃ sotāpattiphale patiṭṭhahi. Meṇḍakaseṭṭhīpi kho satthāraṃ upasaṅkamitvā dhammakathaṃ sutvā sotāpattiphale patiṭṭhāya svātanāya nimantetvā punadivase attano nivesane paṇītena khādanīyena bhojanīyena buddhappamukhaṃ bhikkhusaṅghaṃ parivisitvā eteneva upāyena aḍḍhamāsaṃ mahādānaṃ Adāsi. Satthā bhaddiyanagare yathābhirantaṃ viharitvā pakkāmi.
Tena kho pana samayena bimbisāro ca pasenadikosalo ca aññamaññaṃ bhaginīpatikā honti. Athekadivasaṃ kosalarājā cintesi "bimbisārassa vijite pañca amitabhogā mahāpuññā vasanti, mayhaṃ vijite ekopi tādiso natthi; yannūnāhaṃ bimbisārassa santikaṃ gantvā ekaṃ mahāpuññaṃ yāceyyanti. So tattha gantvā raññā katapaṭisanthāro "kiṃkāraṇā āgatosīti puṭṭho "tumhākaṃ vijite pañca amitabhogā mahāpuññā vasanti, tato ekaṃ gahetvā gamissāmīti āgatomhi, tesu me ekaṃ dethāti āha. "mahākulāni amhehi cāletuṃ na sakkāti. "ahaṃ aladdhā na gamissāmīti. Rājā amaccehi saddhiṃ mantetvā "jotiyādīnaṃ mahākulānaṃ cālanaṃ nāma paṭhaviyā cālanasadisaṃ, meṇḍakamahāseṭṭhissa putto dhanañjayaseṭṭhī nāma atthi, tena saddhiṃ mantetvāva paṭivacanaṃ te dassāmīti vatvā taṃ pakkosāpetvā "tāta kosalarājā `ekaṃ dhanaseṭṭhiṃ gahetvā gamissāmīti vadati, tvaṃ tena saddhiṃ gacchāhīti. "tumhesu pahiṇantesu, gamissāmi devāti. "tenahi parivacchaṃ katvā gaccha tātāti. So attano kattabbayuttakaṃ akāsi. Rājāpissa mahantaṃ sakkāraṃ katvā "imaṃ ādāya gacchathāti pasenadikosalarājānaṃ uyyojesi. So taṃ ādāya sabbattha ekarattivāsena gacchanto ekaṃ phāsukaṭṭhānaṃ patvā nivāsaṃ gaṇhi. Atha naṃ dhanañjayaseṭṭhī pucchi "idaṃ kassa vijitanti. "mayhaṃ seṭṭhīti. "kīvadūro ito sāvatthīti. "sattayojanamatthaketi. "antonagaraṃ sambādhaṃ, amhākaṃ parijano mahanto, sace rocetha, idheva vaseyyāma devāti. Rājā "sādhūti sampaṭicchitvā tasmiṃ ṭhāne nagaraṃ māpetvā tassa datvā agamāsi. Tasmiṃ padese sāyaṃ vasanaṭṭhānassa gahitattā nagarassa "sāketantveva nāmaṃ ahosi.