Sāvatthiyampi kho migāraseṭṭhino putto puṇṇavaḍḍhanakumāro nāma vayappatto ahosi. Atha naṃ mātāpitaro vadiṃsu "tāta tava ruccanaṭṭhāne ekaṃ dārikaṃ upadhārehīti. "mayhaṃ evarūpāya bhariyāya kiccaṃ natthīti. "putta mā evaṃ kari, kulaṃ nāma aputtakaṃ na tiṭṭhatīti. So punappunaṃ vuccamāno "tenahi pañcakalyāṇasamannāgataṃ dārikaṃ labhamāno tumhākaṃ vacanaṃ karissāmīti āha. "kāni panetāni pañca kalyāṇāni nāma tātāti. "kesakalyāṇaṃ maṃsakalyāṇaṃ aṭṭhikalyāṇaṃ chavikalyāṇaṃ vayakalyāṇanti.
Mahāpuññāya hi itthiyā kesā morakalāpasadisā hutvā muñcitvā vissaṭṭhā nivāsanantaṃ paharitvā nivattitvā uddhaggā tiṭṭhanti, idaṃ kesakalyāṇaṃ nāma. Dantāvaraṇaṃ bimbaphalasadisaṃ vaṇṇasampannaṃ samaṃ suphussitaṃ hoti, idaṃ maṃsakalyāṇaṃ nāma. Dantā sukkā samā avivarā ussāpetvā ṭhapitavajirapantī viya samucchinnasaṅkhapantī viya ca sobhanti, idaṃ aṭṭhikalyāṇaṃ nāma. Kāḷiyā vaṇṇakādīhi avilittoeva chavivaṇṇo siniddho nīluppaladāmasadiso hoti, odātāya kaṇṇikārapupphadāmasadiso hoti; idaṃ chavikalyāṇaṃ Nāma. Dasakkhattuṃ vijātāpi kho pana sakiṃ vijātā viya avigatayobbanāva hoti, idaṃ vayakalyāṇaṃ nāmāti.
Athassa mātāpitaro aṭṭhuttarasatabrāhmaṇe nimantetvā bhojetvā "pañcakalyāṇasamannāgatā itthiyo nāma hontīti pucchiṃsu. "āma hontīti. "tenahi evarūpaṃ dārikaṃ pariyesituṃ aṭṭha janā gacchantūti bahudhanaṃ datvā "āgatakāle ca vo kātabbaṃ jānissāma, gacchatha, evarūpaṃpi dārikaṃ pariyesatha, diṭṭhakāle ca imaṃ pilandheyyāthāti satasahassagghanikaṃ suvaṇṇamālaṃ datvā uyyojesuṃ. Te mahantamahantāni nagarāni gantvā pariyesamānā pañcakalyāṇasamannāgataṃ dārikaṃ adisvā nivattitvā āgacchantā vivaṭanakkhattadivase sāketaṃ anuppattā "ajja amhākaṃ kammaṃ nippajjissatīti cintayiṃsu. Tasmiṃ pana nagare anusaṃvaccharaṃ vivaṭanakkhattaṃ nāma hoti. Tadā bahianikkhamanakulānipi parivārena saddhiṃ gehā nikkhamitvā appaṭicchannena sarīrena padasāva nadītīraṃ gacchanti. Tasmiṃ divase khattiyamahāsālādīnaṃ puttāpi "attano samānajātikaṃ manāpaṃ kuladārikaṃ disvā mālāgulena parikkhipissāmāti taṃ taṃ maggaṃ nissāya tiṭṭhanti. Tepi brāhmaṇā nadītīre ekaṃ sālaṃ pavisitvā aṭṭhaṃsu. Tasmiṃ khaṇe visākhā paṇṇarasasoḷasavassuddesikā hutvā sabbābharaṇappaṭimaṇḍitā pañcahi kumārīsatehi parivutā "nadiṃ gantvā nahāyissāmīti taṃ padesaṃ pattā. Athakho megho uṭṭhahitvā pāvassi. Pañcasatā kumāriyo vegena gantvā sālaṃ pavisiṃsu. Brāhmaṇā olokentā Tāsu ekaṃpi pañcakalyāṇasamannāgataṃ na passiṃsu. Visākhā pakatigamaneneva sālaṃ pāvisi. Vatthābharaṇāni temiṃsu. Brāhmaṇā tassā cattāri kalyāṇāni disvā dante passitukāmā "alasajātikā amhākaṃ dhītā, etissā sāmiko kañjikamattampi na labhissati maññeti aññamaññaṃ kathayiṃsu. Atha ne visākhā āha "kaṃ vadetha tumheti. "taṃ kathema ammāti. Madhuro kira tassā saddo kaṃsatālassaro viya niccharati. Atha ne puna madhurasaddena "kiṃkāraṇā kathethāti pucchi. "tava parivāritthiyo vatthālaṅkāre atemetvā vegena sālaṃ paviṭṭhā, tuyhaṃ ettakaṃ ṭhānaṃ vegena āgamanamattampi natthi, vatthābharaṇāni temetvā āgatāsi; tasmā kathemāti. "tātā mā evaṃ vadetha, ahaṃ etāhi balavatarā, kāraṇaṃ pana sallakkhetvā javena nāgatamhīti. "kiṃ ammāti. "tātā cattāro janā javamānā na sobhanti, aparampi ekaṃ kāraṇaṃ atthīti. "katame cattāro javamānā na sobhanti ammāti. "tātā abhisitto rājā tāva sabbābharaṇappaṭimaṇḍito kacchaṃ bandhitvā rājaṅgaṇe javamāno na sobhati, `kiṃ ayaṃ rājā gahapatiko viya dhāvatīti aññadatthu garahaṃ labhati, saṇikaṃ gacchantova sobhati; rañño maṅgalahatthīpi alaṅkato javamāno na sobhati, vāraṇalīḷhāya gacchantova sobhati; pabbajito javamāno na sobhati, `kiṃ ayaṃ samaṇo gihī viya dhāvatīti kevalaṃ garahameva labhati, samitagamanena pana sobhati; itthī javamānā na sobhati, `kiṃ esā itthī puriso viya dhāvatīti garahitabbāva Hoti, pakatigamanena sobhati: ime cattāro javamānā na sobhanti tātāti. "katamaṃ panekaṃ aparaṃ kāraṇaṃ ammāti. "tātā mātāpitaro nāma dhītaraṃ aṅgappaccaṅgāni saṇṭhapetvā posenti, mayaṃ hi vikkīṇiyabhaṇḍaṃ nāma, amhe parakulaṃ pesanatthāya posenti, sace javamānānaṃ nivatthadussakaṇṇe vā akkamitvā bhūmiyaṃ vā pakkhalitvā patitakāle hattho vā pādo vā bhijjeyya, kulasseva bhāro bhaveyyāma, pasādhanabhaṇḍaṃ pana temetvā sukkhissati; imaṃ kāraṇaṃ sallakkhetvā na dhāvitamhi tātāti. Brāhmaṇā tassā kathanakāle dantasampattiṃ disvā "evarūpā no sampatti na diṭṭhapubbāti tassā sādhukāraṃ datvā "amma tuyhevesā anucchavikāti vatvā taṃ suvaṇṇamālaṃ pilandhayiṃsu. Atha ne pucchi "kataranagarato āgatattha tātāti. "sāvatthito ammāti. "seṭṭhikulaṃ kataraṃ nāmāti. "migāraseṭṭhī nāma ammāti. "ayyaputto ko nāmāti. "puṇṇavaḍḍhanakumāro nāma ammāti. Sā "samānajātikaṃ no kulanti adhivāsetvā pitu sāsanaṃ pahiṇi "amhākaṃ rathaṃ pesentūti. Kiñcāpi hi sā āgamanakāle padasā āgatā, suvaṇṇamālāya pana pilandhanakālato paṭṭhāya tathā gantuṃ na labhati, issaradārikā rathādīhi gacchanti, itarā pakatiyānakaṃ abhiruhanti, chattaṃ vā tālapaṇṇaṃ vā upari karonti, tasmiṃpi asati, nivatthasāṭakassa dasantaṃ ukkhipitvā aṃse khipantieva. Tassā pana pitā pañca rathasatāni pesesi.