Manāpanti adāsi. Evaṃ tassa nissandena tā vāriyamānāpi gāvo nikkhamiṃsu. Seṭṭhinā ettakassa dhanassa dinnakāle seṭṭhibhariyā āha "tumhehi mayhaṃ dhītu sabbaṃ saṃvidahitaṃ, veyyāvaccakarā pana dāsadāsiyo na saṃvidahitā, kiṃkāraṇāti. "mama dhītari sasinehanissinehānaṃ jānanatthaṃ, ahaṃ hi tāya saddhiṃ agacchamānake gīvāyaṃ gahetvā na pahiṇāmi, yānaṃ āruyha gamanakāleyeva pana `etāya saddhiṃ gantukāmā gacchantu, mā agantukāmāti vakkhāmīti.
Atha "sve mama dhītā gamissatīti gabbhe nisinno dhītaraṃ samīpe nisīdāpetvā "amma patikule vasantiyā nāma imañca imañca ācāraṃ rakkhituṃ vaṭṭatīti ovādaṃ adāsi. Ayampi migāraseṭṭhī anantaragabbhe nisinno dhanañjayaseṭṭhino ovādaṃ assosi. Sopi seṭṭhī dhītaraṃ evaṃ ovadi "amma sasurakule vasantiyā nāma antoaggi bahi na nīharitabbo, bahiaggi anto na pavesetabbo, dadantasseva dātabbaṃ, adadantassa na dātabbaṃ, dadantassāpi adadantassāpi dātabbaṃ, sukhaṃ nisīditabbaṃ, sukhaṃ bhuñjitabbaṃ, sukhaṃ nipajjitabbaṃ, aggi paricaritabbo, antodevatā namassitabbāti imaṃ dasavidhaṃ ovādaṃ datvā punadivase sabbā seniyo sannipātetvā rājasenāya majjhe aṭṭha kuṭumbike pāṭibhoge gahetvā "sace me gataṭṭhāne dhītu doso uppajjati, tumhehi sodhetabboti vatvā navakoṭiagghanakena mahālatāpasādhanena dhītaraṃ pasādhetvā nahānacuṇṇamūlakaṃ catuppaṇṇāsakoṭidhanaṃ datvā yānaṃ āropetvā sāketassa sāmantā Attano santakesu anurādhapuramattesu cuddasasu bhuttagāmesu bheriñcārāpesi "mama dhītarā saddhiṃ gantukāmā gacchantūti. Saddaṃ sutvāva "amhākaṃ ayyāya gamanakāle kiṃ amhākaṃ idhāti cuddasagāmā kiñci asesetvā nikkhamiṃsu. Dhanañjayaseṭṭhīpi rañño ca migāraseṭṭhino ca sakkāraṃ katvā thokaṃ anugantvā tehi saddhiṃ dhītaraṃ uyyojesi.
Migāraseṭṭhī sabbapacchato yānake nisīditvā gacchanto balakāyaṃ disvā "ke nāmeteti pucchi. "suṇisāya vo veyyāvaccakarā dāsīdāsāti. "ettake ko posessati, pothetvā te palāpetha, apalāyante ito nikkaḍḍhathāti. Visākhā pana "apetha, mā vāretha, balameva balassa bhattaṃ dassatīti āha. Seṭṭhī, evaṃ vuttepi, "amma natthi amhākaṃ etehi attho, ko ete posessatīti leḍḍudaṇḍādīhi pothāpetvā palāpetvā sesake "alaṃ amhākaṃ ettakehīti gahetvā pāyāsi.