Pasādhanaṃ pammussitvā gatāti. "ekamante ṭhapehi ānandāti. Thero taṃ ukkhipitvā sopāṇapasse laggetvā ṭhapesi. Visākhāpi suppiyāya saddhiṃ "āgantukagamikagilānādīnaṃ kattabbayuttakaṃ jānissāmīti antovihāre vicari. Tā pana upāsikāyo antovihāre disvā sappimadhutelādīhi atthikā pakatiyāva daharā ca sāmaṇerā ca thālakādīni gahetvā upasaṅkamanti. Tasmiṃpi divase tatheva kariṃsu. Athekaṃ gilānaṃ disvā suppiyā "kenattho ayyassāti pucchitvā, "paṭicchādanīyenāti vutte, "hotu ayya, pesessāmīti dutiyadivase kappiyamaṃsaṃ alabhantī attano ūrumaṃsena kattabbakiccaṃ katvā puna satthari pasādena pākatikasarīrāva ahosi. Visākhāpi gilāne dahare ca sāmaṇere ca oloketvā aññena dvārena nikkhamitvā vihārupacāre ṭhitā "amma pasādhanaṃ āhara, pasādhessāmīti āha. Tasmiṃ khaṇe sā dāsī pammussitvā nikkhantabhāvaṃ ñatvā "ayye pammuṭṭhamhīti āha. "tenahi gantvā gaṇhitvā ehi; sace pana mayhaṃ ayyena ānandattherena ukkhipitvā aññasmiṃ ṭhāne ṭhapitaṃ hoti, mā āhareyyāsi, ayyasseva taṃ mayā pariccattanti. Jānāti kira sā "manussānaṃ pammuṭṭhabhaṇḍakaṃ thero paṭisāmetīti; tasmā evamāha. Theropi taṃ dāsiṃ disvāva "kimatthaṃ āgatāsīti pucchitvā, "ayyāya me pasādhanaṃ pammussitvā āgatamhīti vutte, "etasmiṃ me sopāṇapasse ṭhapitaṃ, gaṇhāhīti āha. Sā "ayya tumhākaṃ hatthena āmaṭṭhabhaṇḍakaṃ mayhaṃ ayyāya anāharaṇīyaṃ katanti vatvā tucchahatthāva gantvā "kiṃ ammāti visākhāya puṭṭhā tamatthaṃ ārocesi. "amma nāhaṃ mama ayyena āmaṭṭhabhaṇḍakaṃ pilandhissāmi, pariccattaṃ mayā, ayyānaṃ pana paṭijaggituṃ dukkhaṃ, taṃ vissajjetvā kappiyabhaṇḍaṃ upanessāmi, gaccha taṃ āharāhīti. Sā gantvā āhari. Visākhā taṃ apilandhitvā kammāre pakkosāpetvā agghāpesi. Tehi "nava koṭiyo agghati, kārāpaṇiyaṃ pana satasahassanti vutte, pasādhanaṃ yāne ṭhapetvā "tenahi taṃ vikkīṇathāti āha. Tattakaṃ dhanaṃ datvā gaṇhituṃ na koci sakkhissati, taṃ hi pasādhanaṃ pasādhetuṃ anucchavikā itthiyo dullabhā. Paṭhavīmaṇḍalasmiṃ hi tissova itthiyo mahālatāpasādhanaṃ labhiṃsu "visākhā mahāupāsikā, bandhulamallasenāpatissa bhariyā mallikā, bārāṇasīseṭṭhino dhītāti; tasmā visākhā sayameva tassa mūlaṃ datvā satasahassādhikā navakoṭiyo sakaṭe āropetvā vihāraṃ netvā satthāraṃ vanditvā "bhante mayhaṃ ayyena ānandattherena mama pasādhanaṃ hatthena āmaṭṭhaṃ, tenāmaṭṭhakālato paṭṭhāya na sakkā mayā pilandhituṃ, taṃ pana `vissajjetvā kappiyaṃ upanessāmīti vikkīṇāpentī aññaṃ gaṇhituṃ samatthaṃ adisvā ahamevassa mūlaṃ gāhāpetvā āgatā, catūsu paccayesu katarappaccaye upanemi bhanteti. "pācīnadvāre saṅghassa vasanaṭṭhānaṃ kātuṃ te yuttaṃ visākheti. "yuttaṃ bhanteti visākhā tuṭṭhamānasā navakoṭīhi bhūmimeva gaṇhi, aparāhi navakoṭīhi vihāraṃ kātuṃ ārabhi.