nānākimikulākiṇṇaṃ mīḷhaṭṭhānaṃva pūtikanti.

Paricchedato heṭṭhā aṭṭhisaṅghāṭena tattha patiṭṭhitatalena ca upari tacena tiriyaṃ aññamaññena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ maṃsaṃ vaṇṇādito vavatthapeti.

Tato paraṃ sarīre navasatappabhedā nahārū vaṇṇato setāti vavatthapeti, madhukavaṇṇātipi eke. Saṇṭhānato nānāsaṇṭhānāti. Tathāhi tattha mahantā mahantā nahārū kandalamakulasaṇṭhānā, tato sukhumatarā sūkaravāgurārakhjusaṇṭhānā, tato aṇukatarā pūtilatāsaṇṭhānā, tato aṇukatarā sīhaḷānaṃ mahāvīṇātantisaṇṭhānā, tato aṇukatarā thūlasuttasaṇṭhānā, hatthapiṭṭhipādapiṭṭhīsu nahārū sakuṇapādasaṇṭhānā. Sīse nahārū gāmadārakānaṃ sīse ṭhapitaviraḷataradukkulasaṇṭhānā, piṭṭhiyaṃ nahārū temetvā ātape pasāritamacchajālasaṇṭhānā, avasesā imasmiṃ sarīre taṃtaṃaṅgapaccaṅgānugatā nahārū sarīre paṭimukkajālakañcukasaṇṭhānāti. Disato dvīsu disāsu jātā. Tesu ca dakkhiṇakaṇṇacūḷikato paṭṭhāya pañca kaṇḍaranāmakā mahānahārū purato ca pacchato ca vinaddhamānā vāmapassaṃ gatā, vāmakaṇṇacūḷikato paṭṭhāya pañca purato ca pacchato ca vinaddhamānā dakkhiṇapassaṃ gatā, dakkhiṇagalavāṭakato paṭṭhāya pañca purato ca pacchato ca vinaddhamānā. Vāmapassaṃ gatā, vāmagalavāṭakato paṭṭhāya pañca purato ca pacchato ca vinaddhamānā dakkhiṇapassaṃ gatā, dakkhiṇahatthaṃ vinaddhamānā purato ca pacchato ca pañca pañcāti dasa kaṇḍaranāmakā eva