Harāpetvā yathāladdhena byañjanena saddhiṃ allameva bhattaṃ pacchiyaṃ opīḷetvā ādāya yojanikaṃ maggaṃ pakkhanto, tassa gacchantasseva, bhattaṃ pakkaṃ ahosi. So anucchiṭṭhaṃ katvāva thokaṃ bhattaṃ apanetvā bhuñjanto ekaṃ addhikaṃ disvā "mayā apanītaṃ thokaṃ anucchiṭṭhaṃ bhattameva atthi, gahetvā bhuñja sāmīti. So gaṇhitvā bhuñji. Itaropi bhuñjitvā ekaṃ bhattamuṭṭhiṃ udake khipitvā mukhaṃ vikkhāletvā mahantena saddena "imasmiṃ nadīpadese adhivatthā nāgā supaṇṇā devatā ca vacanaṃ me suṇantu; rājā mayhaṃ āṇaṃ kattukāmo `kumuduppalehi saddhiṃ aruṇavatīmattikaṃ āharāti maṃ āṇāpesi, addhikamanussassa ca me bhattaṃ dinnaṃ, taṃ sahassānisaṃsaṃ, udake macchānaṃ dinnaṃ, taṃ satānisaṃsaṃ, ettakaṃ puññaphalaṃ tumhākaṃ pattiṃ katvā demi; mayhaṃ kumuduppalehi saddhiṃ aruṇavatīmattikaṃ āharathāti tikkhattuṃ anussāvesi. Tattha adhivattho nāgarājā taṃ saddaṃ sutvā mahallakavesena tassa santikaṃ gantvā "kiṃ vadesīti āha. So punapi tatheva vatvā, "mayhaṃ taṃ pattiṃ dehīti vutte, "demi sāmīti āha; punapi "dehīti vutte, "demi sāmīti āha. Evaṃ so dve tayo vāre pattiṃ āharāpetvā kumuduppalehi saddhiṃ aruṇavatīmattikaṃ adāsi.
Rājā pana cintesi "manussā nāma bahumantā, sace so kenaci upāyena labheyya, kiccaṃ me na nippajjeyyāti. So sakālasseva dvāraṃ pidahāpetvā muddikaṃ attano santikaṃ āharāpesi. Itaropi puriso rañño nahānavelāyameva āgantvā dvāraṃ alabhanto Dvārapālaṃ pakkositvā "dvāraṃ vivarāti āha. "na sakkā vivarituṃ, rājā sakālasseva muddikaṃ rājagehaṃ harāpesīti. So "rājadūto ahaṃ, dvāraṃ vivarāti vatvāpi dvāraṃ alabhanto "natthi me idāni jīvitaṃ, kinnu kho karissāmīti cintetvā dvārassa upariummāre mattikāpiṇḍaṃ khipitvā tassupari pupphāni laggetvā mahāsaddaṃ karonto "ambho nagaravāsino mayā rañño āṇattiyā katabhāvaṃ jānātha; rājā maṃ akāraṇena vināsetukāmoti tikkhattuṃ viravitvā "kattha nu kho gamissāmīti cintento "bhikkhū nāma muduhadayā, vihāraṃ gantvā nipajjissāmīti sanniṭṭhānamakāsi. Ime nāma sattā sukhitakāle bhikkhūnaṃ atthibhāvaṃpi ajānitvā dukkhābhibhūtāva vihāraṃ gantukāmā honti; tasmā sopi "aññaṃ me tāṇaṃ natthīti vihāraṃ gantvā ekasmiṃ phāsukaṭṭhāne nipajji. Raññopi taṃ rattiṃ niddaṃ alabhantassa itthiṃ anussarantassa, kāmapariḷāho uppajji. So cintesi "vibhātakkhaṇeyeva taṃ purisaṃ ghātetvā taṃ itthiṃ ānessāmīti.