Desanā rājagahe samuṭṭhitā. Theraṃ kira rājagahaṃ nissāya pipphaliguhāyaṃ vasantaṃ dve saddhivihārikā upaṭṭhahiṃsu. Tesu eko sakkaccaṃ vattaṃ karoti, eko tena kataṃ vattaṃ attanā kataṃ viya dassento mukhodakadantakaṭṭhānaṃ paṭiyāditabhāvaṃ ñatvā "bhante mukhodakadantakaṭṭhāni paṭiyāditāni, mukhaṃ dhovathāti vadati, pādadhovananahānādikālepi evameva vadati. Itaro cintesi "ayaṃ niccakālaṃ mayā kataṃ vattaṃ attanā kataṃ viya dasseti, hotu, kattabbamassa karissāmīti; tassa bhuñjitvā supantasseva, nahānodakaṃ tāpetvā ekasmiṃ kuṭe katvā piṭṭhikoṭṭhake ṭhapesi, udakatāpanabhājane pana nāḷimattaṃ udakaṃ sesetvā usumaṃ muñcantaṃ ṭhapesi. Itaro sāyaṇhasamaye pabujjhitvā usumaṃ nikkhamantaṃ disvā "udakaṃ tāpetvā koṭṭhake udakaṃ ṭhapitaṃ bhavissatīti vegena gantvā theraṃ vanditvā "bhante koṭṭhake udakaṃ ṭhapitaṃ, nahāyathāti vatvā therena saddhiṃyeva koṭṭhakaṃ pāvisi. Thero udakaṃ apassanto "kahaṃ udakaṃ āvusoti āha. Daharo aggisālaṃ gantvā bhājane uḷuṅkaṃ otāretvā tucchabhāvaṃ ñatvā "passatha dubbinītassa kammaṃ, tucchabhājanaṃ uddhane āropetvā kuhiṃ gato, ahaṃ `koṭṭhake udakanti saññāya ārocesinti ujjhāyanto ghaṭaṃ ādāya titthaṃ
Agamāsi. Itaropi piṭṭhikoṭṭhakato udakaṃ āharitvā koṭṭhake ṭhapesi. Theropi cintesi "ayaṃ daharo `udakaṃ me tāpetvā koṭṭhake ṭhapitaṃ, etha, bhante nahāyathāti vatvā idāni ujjhāyanto ghaṭaṃ ādāya titthaṃ gacchati, kinnu kho etanti upadhārento "ettakaṃ kālaṃ esa daharo iminā kataṃ vattaṃ attanā kataṃ viya pakāsesīti ñatvā sāyaṃ āgantvā nisinnassa ovādaṃ adāsi "āvuso bhikkhunā nāma attanā katameva `katanti vattuṃ vaṭṭati, no akataṃ; tvaṃ idāni `koṭṭhake udakaṃ ṭhapitaṃ, nahāyatha bhanteti vatvā, mayi pavisitvā ṭhite, ghaṭaṃ ādāya ujjhāyanto gacchasi; pabbajitassa nāma evaṃ kātuṃ na vaṭṭatīti. So "passatha therassa kammaṃ, udakamattaṃ nissāya maṃ evaṃ vadesīti kujjhitvā punadivase therena saddhiṃ piṇḍāya na pāvisi. Thero itarena saddhiṃ ekaṃ padesaṃ agamāsi. So, tasmiṃ gate, therassa upaṭṭhākakulaṃ gantvā "thero kahaṃ bhanteti puṭṭho "therassa aphāsukaṃ jātaṃ, vihāreyeva nisinnoti āha. "kiṃ pana bhante laddhuṃ vaṭṭatīti. "evarūpaṃ kira nāma āhāraṃ dethāti. Tena vuttaniyāmeneva sampādetvā adaṃsu. So antarāmaggeva taṃ bhuñjitvā vihāraṃ gato. Theropi gataṭṭhāne mahantaṃ sukhumavatthaṃ labhitvā attanā saddhiṃ gatadaharassa adāsi. so taṃ rajitvā attano nivāsanapārupanaṃ akāsi. Thero punadivase taṃ upaṭṭhākakulaṃ gantvā, "bhante `tumhākaṃ kira aphāsukaṃ jātanti amhehi daharena vuttaniyāmeneva paṭiyādetvā āhāro pesito, paribhuñjitvā vo phāsukaṃ jātanti vutte, tuṇhī ahosi. Vihāraṃ pana gantvā taṃ daharaṃ Sāyaṃ vanditvā nisinnaṃ evamāha "āvuso tayā kira hīyo evaṃ nāma kataṃ, idaṃ pabbajitānaṃ ananucchavikaṃ, viññattiṃ katvā bhuñjituṃ na vaṭṭatīti. So kujjhitvā there āghātaṃ bandhi "purimadivase udakamattaṃ nissāya maṃ musāvādiṃ katvā ajja attano upaṭṭhākakule bhattamuṭṭhiyā bhuttakāraṇā maṃ `viññattiṃ katvā bhuñjituṃ na vaṭṭatīti vadesi, vatthampi tena attano upaṭṭhākasseva dinnaṃ; aho therassa bhāriyaṃ kammaṃ, jānissāmissa kattabbayuttakanti; punadivase there gāmaṃ pavisante, sayaṃ vihāre ohīyitvā daṇḍaṃ gahetvā paribhogabhājanādīni bhinditvā therassa paṇṇasālāya aggiṃ datvā, yaṃ na jhāyati, taṃ muggarena paharanto bhinditvā nikkhamitvā palāto kālaṃ katvā avīcimahāniraye nibbatti. Mahājano kathaṃ samuṭṭhāpesi "therassa kira saddhivihāriko ovādamattaṃ asahanto kujjhitvā paṇṇasālaṃ jhāpetvā palātoti.