Sā kira padumuttarabuddhassa pādamūle patthanaṃ paṭṭhapetvā kappasatasahassaṃ puññāni kurumānā devesu ca manussesu ca saṃsarantī imasmiṃ buddhuppāde devalokato cavitvā sāvatthiyaṃ seṭṭhikule paṭisandhiṃ gaṇhi. Nīluppalagabbhasamānavaṇṇatāya cassā "uppalavaṇṇātveva nāmaṃ akaṃsu. Athassā vayappattakāle sakalajambudīpe rājāno ca seṭṭhino ca seṭṭhissa santikaṃ paṇṇākāraṃ pahiṇiṃsu "dhītaraṃ amhākaṃ detūti. Appahiṇanto nāma nāhosi. Tato seṭṭhī cintesi "ahaṃ sabbesaṃ manaṃ gahetuṃ na sakkhissāmi, upāyaṃ panekaṃ karissāmīti. So dhītaraṃ pakkositvā "amma pabbajituṃ sakkhissasīti āha. Tassā pacchimabhavikattā pitu vacanaṃ sīse āsittasatapākatelaṃ viya ahosi; tasmā pitaraṃ "pabbajissāmi tātāti āha. So tassā mahantaṃ Sakkāraṃ katvā taṃ bhikkhunūpassayaṃ netvā pabbājesi. Tassā acirappabbajitāya eva uposathāgāre tālavāro pāpuṇi. Sā dīpaṃ jāletvā uposathāgāraṃ sammajjitvā dīpasikhāya nimittaṃ gaṇhitvā ṭhitāva punappunaṃ olokayamānā tejokasiṇārammaṇaṃ jhānaṃ nibbattetvā tameva pādakaṃ katvā arahattaṃ pāpuṇi saddhiṃ paṭisambhidāhi ceva abhiññāhi ca. Sā aparena samayena janapadacārikaṃ caritvā paccāgatā andhavanaṃ pāvisi. Tadā bhikkhunīnaṃ araññavāso appaṭikkhitto hoti. Athassā manussā tattha kuṭikaṃ katvā mañcakaṃ paññāpetvā sāṇiyā parikkhipiṃsu. Sā sāvatthiyaṃ piṇḍāya pavisitvā nikkhami. Mātulaputto panassā nandamāṇavo gihikālato paṭṭhāya paṭibaddhacitto tassā āgatabhāvaṃ sutvā theriyā āgamanato puretarameva andhavanaṃ gantvā taṃ kuṭikaṃ pavisitvā heṭṭhāmañce nilīno, theriyā āgantvā kuṭikaṃ pavisitvā dvāraṃ pidhāya mañcake nisinnamattāya, bahi ātapato āgatattā cakkhupathe andhakāre avigateyeva, heṭṭhāmañcato nikkhamitvā mañcakaṃ abhiruyha "mā nassi bāla, mā nassi bālāti theriyā vāriyamāno abhibhavitvā attano paṭṭhitakammaṃ katvā pāyāsi. Athassa aguṇaṃ dhāretuṃ asakkontī viya mahāpaṭhavī dvedhā bhijji. So paṭhaviṃ paviṭṭho gantvā mahāavīcimhi nibbatti. Therīpi tamatthaṃ bhikkhunīnaṃ ārocesi. Bhikkhuniyo bhikkhūnaṃ tamatthaṃ ārocesuṃ. Bhikkhū bhagavato ārocesuṃ. Taṃ sutvā satthā bhikkhū āmantetvā "bhikkhave bhikkhubhikkhunīupāsakaupāsikāsu yo koci bālo pāpakammaṃ karonto madhusakkharādīsu Kañcideva madhurarasaṃ khādamāno puriso viya haṭṭhappahaṭṭho udaggudaggo viya karotīti anusandhiṃ ghaṭetvā dhammaṃ desento imaṃ gāthamāha