Evaṃ khīṇāsavassa citte duvidhopi kāmo na lippati na saṇṭhātīti anusandhiṃ ghaṭetvā dhammaṃ desento imaṃ brāhmaṇavagge gāthamāha

"vāri pokkharapatteva āraggeriva sāsapo

yo na lippati kāmesu; tamahaṃ brūmi brāhmaṇanti.

Imissā attho brāhmaṇavaggeyeva āvibhavissati. satthā pana rājānaṃ pasenadikosalaṃ pakkosāpetvā "mahārāja imasmiṃ sāsane yatheva kulaputtā evaṃ kuladhītaropi mahantaṃ ñātigaṇañca bhogakkhandhañca pahāya pabbajitvā araññe viharanti, tā araññe viharamānā rāgarattā pāpapuggalā omānātimānavasena viheṭhentipi brahmacariyantarāyaṃpi pāpenti; tasmā bhikkhunīsaṅghassa antonagare vasanaṭṭhānaṃ kātuṃ vaṭṭatīti. Rājā "sādhūti sampaṭicchitvā nagarassa ekapasse bhikkhunīsaṅghassa vasanaṭṭhānaṃ kāresi. Tato paṭṭhāya bhikkhuniyo antogāmeyeva vasanti.