Buddhānaṃpi kho paccūsakāle lokaṃ volokanaṃ avijahitameva hoti; tasmā ekadivasaṃ bhagavato paccūsasamaye lokaṃ volokentassa, ayaṃ jambukājīvako ñāṇajālassa anto paññāyi. Satthā "kinnu kho bhavissatīti āvajjitvā tassa saha paṭisambhidāhi arahattassa upanissayaṃ disvā "ahaṃ etaṃ ādiṃ katvā ekaṃ gāthaṃ bhāsissāmi, gāthāpariyosāne caturāsītiyā pāṇasahassānaṃ dhammābhisamayo bhavissati, imaṃ kulaputtaṃ nissāya mahājano sotthibhāvaṃ pāpuṇissatīti ñatvā punadivase rājagahe Piṇḍāya caritvā piṇḍapātappaṭikkanto ānandattheraṃ āha "ānanda jambukājīvakassa santikaṃ gamissāmīti. "bhante kiṃ tumheyeva gamissathāti. "āma ahamevāti. Evaṃ vatvā satthā vaḍḍhamānakacchāyāya tassa santikaṃ pāyāsi. Devatā cintayiṃsu "satthā sāyaṃ jambukājīvakassa santikaṃ gacchati, so ca jegucche uccārapassāvaṭṭhāne dantakaṭṭhakkiliṭṭhe piṭṭhipāsāṇe vasati, devaṃ vassāpetuṃ vaṭṭatīti attano ānubhāvena taṃmuhuttaṃyeva devaṃ vassāpesuṃ. Piṭṭhipāsāṇo suci nimmalo ahosi. Athassa upari pañcavaṇṇaṃ pupphavassaṃ vassāpayiṃsu. Satthā sāyaṃ jambukājīvakassa santikaṃ gantvā "jambukāti saddamakāsi. Jambuko "ko nu kho esa dujjāno maṃ jambukavādena vadatīti cintetvā "ko esoti āha. "ahaṃ jambukāti. "kiṃ mahāsamaṇāti. "ajja me ekarattiṃ idha vasanaṭṭhānaṃ dehīti. "natthi mahāsamaṇa imasmiṃ ṭhāne vasanaṭṭhānanti. "jambuka mā evaṃ kari, ekarattiṃ me vasanaṭṭhānaṃ dehi; pabbajitā nāma pabbajitaṃ paṭṭhenti, manussā manussaṃ, pasavo pasunti. "kiṃ pana tvaṃ pabbajitosīti. "āma pabbajitomhīti. "sace tvaṃ pabbajito, kahante lābukaṃ, kahaṃ dhūmakaṭacchuko, kahaṃ yaññasuttakanti. "atthetaṃ mayhaṃ, visuṃ visuṃ pana gahetvā caraṇaṃ dukkhanti abbhantareyeva gahetvā carāmīti. So "carissasi tvaṃ etaṃ aggaṇhitvāti kujjhi. Atha naṃ satthā āha "hotu jambuka, mā kujjha, vasanaṭṭhānaṃ me ācikkhāhīti. "natthi mahāsamaṇa ettha

Vasanaṭṭhānanti. Satthā tassa vasanaṭṭhānato avidūre ekaṃ pabbhāraṃ atthi, taṃ niddisanto "etasmiṃ pabbhāre ko vasatīti āha. "na koci mahāsamaṇāti. "tenahi etaṃ mayhaṃ dehīti. "tvaññeva jānāhi mahāsamaṇāti. Satthā pabbhāre nisīdanaṃ paññāpetvā nisīdi.