Atha paṭhamayāme cattāro mahārājāno catuddisā ekobhāsaṃ karontā upaṭṭhānaṃ āgamiṃsu. Jambuko obhāsaṃ disvā "kiṃobhāso nāmesoti cintesi. Majjhimayāme sakko devarājā āgami. Jambuko tampi disvā "ko nāmesoti cintesi. Pacchimayāme ekāya aṅguliyā ekaṃ dvīhi dve .pe. Dasahi dasa cakkavāḷāni obhāsetuṃ samattho mahābrahmā sakalaaraññaṃ ekobhāsaṃ karonto āgami. Jambuko tampi disvā "ko nu kho esoti cintetvā pātova satthu santikaṃ gantvā paṭisanthāraṃ katvā ekamantaṃ ṭhito satthāraṃ pucchi "mahāsamaṇa tumhākaṃ santikaṃ catasso disā obhāsento paṭhamayāme ko āgatoti. "cattāro mahārājānoti. "kiṃkāraṇāti. "maṃ upaṭṭhātunti. "kiṃ pana tvaṃ catūhi mahārājehi uttaritaroti. "āma jambuka, ahañhi rājūnaṃ atirājāti. "majjhimayāme pana ko āgatoti. "sakko devarājāti. "kiṃkāraṇāti. "maṃ upaṭṭhātumevāti. "kiṃ pana tvaṃ sakkadevarājatopi uttaritaroti. "āma jambuka, sakkatopi uttaritaromhi, eso pana mayhaṃ gilānupaṭṭhāko kappiyakārakasāmaṇerasadisoti. "pacchimayāme sakalaaraññaṃ obhāsetvā ko āgatoti. "yaṃ nissāya loke brāhmaṇādayopi khipitvā pakkhalitvā `namo mahābrahmunoti vadanti, Soeva mahābrahmāti. "kiṃ pana tvaṃ mahābrahmunāpi uttaritaroti. "āma jambuka, ahañhi brahmunāpi atibrahmāti. "acchariyosi tvaṃ mahāsamaṇa, mayhaṃ pana pañcapaṇṇāsavassāni idha vasantassa, etesu ekopi maṃ upaṭṭhātuṃ nāgatapubbo; ahañhi ettakaṃ addhānaṃ vātabhakkho hutvā ṭhitakova vītināmesiṃ, na tāva te mayhaṃ upaṭṭhānaṃ āgatapubbāti. Atha naṃ satthā āha "jambuka tvaṃ lokasmiṃ andhabālaṃ mahājanaṃ vañcayamāno maṃpi vañcetukāmo jāto; nanu tvaṃ pañcapaṇṇāsavassāni gūthameva khādasi, bhūmiyaṃyeva nipajji, naggo hutvā vicari, tālaṭṭhikhaṇḍena kese luñci, atha ca pana lokaṃ vañcento `ahaṃ vātabhakkhomhi, ekapādena tiṭṭhāmi, na nisīdāmi, na nipajjāmīti vadesi, maṃpi vañcetukāmosi; pubbepi tvaṃ pāpikaṃ lāmikaṃ diṭṭhiṃ nissāya ettakaṃ kālaṃ gūthabhakkhosi bhūmisayo naggo vicaranto tālaṭṭhikhaṇḍena kesaluñcanaṃ patto, idānipi pāpikaṃ lāmikaṃ diṭṭhimeva gaṇhāsīti. "kiṃ pana mayā kataṃ mahāsamaṇāti. Athassa satthā pubbe katakammaṃ ācikkhi. Tassa, satthari kathenteyeva, saṃvego uppanno, hirottappaṃ upaṭṭhitaṃ. So ukkuṭiko nisīdi. Athassa satthā udakasāṭakaṃ khipitvā adāsi. So taṃ nivāsetvā satthāraṃ vanditvā ekamantaṃ nisīdi. Satthāpissa anupubbīkathaṃ kathetvā dhammaṃ desesi. So desanāvasāne saha paṭisambhidāhi arahattaṃ patvā satthāraṃ vanditvā uṭṭhāyāsanā pabbajjañca upasampadañca yāci. Ettāvatāssa purimakammaṃ parikkhīṇaṃ. Ayañhi khīṇāsavamahātheraṃ catūhi akkosehi akkositvā, yāvāyaṃ Mahāpaṭhavī tigāvutādhikaṃ yojanaṃ ussannā; tāva avīcimhi pacitvā tattha pakkāvasesena pañcapaṇṇāsavassāni imaṃ vippakāraṃ patto, tenassa taṃ kammaṃ khīṇaṃ, vīsativassasahassāni iminā katassa samaṇadhammassa phalaṃ nāsetuṃ na sakkā; tasmā taṃ satthā dakkhiṇahatthaṃ pasāretvā "ehi bhikkhu cara brahmacariyanti āha. Tāvadevassa gihiliṅgaṃ antaradhāyi, aṭṭhaparikkhāradharo saṭṭhivassatthero viya ahosi.