Tato paraṃ sarīrassa abbhantare dvigoḷakappabhedampi vakkaṃ vaṇṇato mandarattaṃ pāḷibaddhakaṭṭhikavaṇṇanti vavatthapeti. Saṇṭhānato gāmadārakānaṃ suttāvutakīḷāgoḷakasaṇṭhānanti, ekavaṇṭasahakāradvayasaṇṭhānantipi eke. Disato uparimāya disāya jātaṃ. Okāsato galavāṭakā vinikkhantena ekamūlena thokaṃ gantvā dvidhā bhinnena thūlanahārunāpi upanibaddhaṃ hutvā hadayamaṃsaṃ parikkhipitvā ṭhitanti.
Tattha yathā vaṇṭūpanibaddhaṃ sahakāradvayaṃ na jānāti "ahaṃ vaṇṭena upanibaddhan"ti, nāpi vaṇṭaṃ jānāti "mayā sahakāradvayaṃ upanibaddhan"ti, evameva na vakkaṃ jānāti "ahaṃ thūlanahārunā upanibaddhan"ti, napi thūlanahāru jānāti "mayā vakkaṃ upanibaddhan"ti. Ābhogapaccavekkhaṇavirahitā hi ete dhammā .pe. Na puggaloti. Paricchedato vakkaṃ vakkabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ vakkaṃ vaṇṇādito vavatthapeti.
Tato paraṃ sarīrassa abbhantare hadayaṃ vaṇṇato rattapadumapattapiṭṭhivaṇṇanti vavatthapeti. Saṇṭhānato bāhirapattāni apanetvā adhomukhaṭhapitapadumamakulasaṇṭhānaṃ. Tañca aggacchinnapunnāgaphalamiva vivarekapassaṃ bahi maṭṭhaṃ anto kosāṭakīphalassa abbhantarasadisaṃ. Paññābahulānaṃ thokaṃ vikasitaṃ, mandapaññānaṃ makulitameva. Yaṃ rūpaṃ nissāya manodhātu ca manoviññāṇadhātu ca pavattanti, taṃ apanetvā avasesamaṃsapiṇḍasaṅkhātahadayabbhantare aḍḍhapasatamattaṃ lohitaṃ saṇṭhāti, yaṃ rāgacaritassa rattaṃ, dosacaritassa kāḷakaṃ, mohacaritassa maṃsadhovanodakasadisaṃ,
Disato uparimāya disāya jātaṃ. Okāsato sarīrabbhantare dvinnaṃ thanānaṃ majjhe patiṭṭhitanti.