Dānassa evarūpo ānubhāvo hoti. So bahinagareyeva gharapaṭipāṭiyā caranto pañca kambalasatāni labhitvā antonagaraṃ pāvisi. Manussā ito cito ca kambale āharanti. Eko pana puriso āpaṇadvārena gacchanto pañca kambalasatāni pasāretvā nisinnaṃ ekaṃ āpaṇikaṃ disvā āha "ambho eko sāmaṇero kambale saṃharanto āgacchati, tava kambale paṭicchādehīti. "kiṃ pana so dinnake gaṇhāti udāhu adinnaketi. "dinnake gaṇhātīti. "evaṃ sante, sace icchissāmi, dassāmi; no ce, na dassāmi; gaccha tvanti uyyojesi. Maccharino hi andhabālā, evaṃ paresu dānaṃ dadamānesu, maccharāyitvā asadisadānaṃ disvā maccharāyanto kālo viya niraye nibbattanti. Āpaṇiko cintesi "ayaṃ puriso attano dhammatāya āgacchamāno `tava kambale paṭicchādehīti maṃ āha, ahampi `sace so dinnakaṃ gaṇhāti, ahaṃ mama santakaṃ sace icchāmi, dassāmi; no ce, na dassāmīti avacaṃ; diṭṭhakaṃ pana adentassa lajjā uppajjati, attano santakaṃ paṭicchādentassa doso natthi; imesu pañcasu kambalasatesu dve kambalā satasahassagghanikā, ime paṭicchādetuṃ vaṭṭatīti dvepi kambale dasāya dasaṃ sambandhitvā tesaṃ antare pakkhipitvā paṭicchādesi. Sāmaṇeropi bhikkhusahassena saddhiṃ taṃ padesaṃ pāpuṇi. Āpaṇikassa sāmaṇeraṃ disvāva puttasineho uppajji. Sakalasarīraṃ sinehena paripuṇṇaṃ ahosi; so cintesi "tiṭṭhantu kambalāni, imaṃ disvā hadayamaṃsampi dātuṃ yuttarūpanti. So te dvepi kambale nīharitvā sāmaṇerassa pādamūle ṭhapetvā vanditvā "bhante Tayā diṭṭhadhammassa bhāgī assanti avaca. Sopissa "evaṃ hotūti anumodanaṃ akāsi. Sāmaṇero antonagarepi pañca kambalasatāni labhi. Evaṃ ekadivaseyeva kambalasahassaṃ labhitvā bhikkhusahassassa adāsi. Athassa "kambaladāyakatissoti nāmaṃ kariṃsu. Evaṃ nāmakaraṇadivase dinnakambalo sattavassikakāle kambalasahassabhāvaṃ pāpuṇi. Buddhasāsanaṃ hi ṭhapetvā natthaññaṃ ṭhānaṃ, yattha appaṃ dinnaṃ bahuṃ hoti, bahuṃ dinnaṃ bahutaraṃ; tenāha bhagavā "tathārūpoyaṃ bhikkhave bhikkhusaṅgho; yathārūpe bhikkhusaṅghe appaṃ dinnaṃ bahuṃ hoti, bahuṃ dinnaṃ bahutaranti. Evaṃ sāmaṇeropi ekassa kambalassa nissandena sattavassiko kambalasahassaṃ labhi.