Athassa pavāretvā vutthavassakāle upajjhāyo satthāraṃ upasaṅkamitvā vanditvā āha "bhante tissasāmaṇerassa santikaṃ gacchāmīti. "gaccha sārīputtāti. So attano parivāre pañcasate bhikkhū ādāya pakkamanto "āvuso moggallāna, ahaṃ tissasāmaṇerassa santikaṃ gacchāmīti āha. Moggallānatthero "ahampi āvuso gacchissāmīti pañcahi bhikkhusatehi saddhiṃ nikkhami. Etenevupāyena "mahākassapatthero anuruddhatthero upālitthero puṇṇattheroti sabbe mahāsāvakā pañcahi pañcahi bhikkhusatehi saddhiṃ nikkhamiṃsu. Sabbesampi mahāsāvakānaṃ parivārā cattāḷīsabhikkhusahassāni ahesuṃ. Te vīsatiyojanasataṃ maggaṃ gantvā gocaragāmaṃ sampatte sāmaṇerassa nibaddhupaṭṭhāko upāsako gāmadvāreyeva disvā paccuggantvā vandi. Atha naṃ sārīputtatthero pucchi "atthi nu kho upāsaka imasmiṃ padese āraññakavihāroti. "atthi bhanteti. "sabhikkhukoti. "sabhikkhuko bhanteti. "ko nāma tattha vasatīti. "vanavāsitisso bhanteti. "tenahi maggaṃ no ācikkhāti. "ke tumhe bhanteti. "mayaṃ sāmaṇerassa santikaṃ āgatāti. Upāsako te oloketvā dhammasenāpatiṃ ādiṃ katvā sabbepi mahāsāvake sañjāni. So nirantaraṃ pītiyā phuṭṭhasarīro
Hutvā "tiṭṭhatha tāva bhanteti vegena gāmaṃ pavisitvā "ete ayyā sārīputtattheraṃ ādiṃ katvā asītimahāsāvakā attano attano parivārehi saddhiṃ sāmaṇerassa santikaṃ āgatā, mañcapīṭhapaccattharaṇadīpatelādīni gahetvā vegena nikkhamathāti ugghosesi. Manussā tāvadeva mañcādīni gahetvā therānaṃ padānupadikā hutvā therehi saddhiṃyeva vihāraṃ pavisiṃsu. Sāmaṇero bhikkhusaṅghaṃ sañjānitvā katipayānaṃ mahātherānaṃ pattacīvarāni paṭiggahetvā vattamakāsi. Tassa therānaṃ vasanaṭṭhānaṃ saṃvidahantassa pattacīvare paṭisāmentasseva, samandhakāro jāto. Sārīputtatthero upāsake āha "gacchatha upāsakā, tumhākaṃ andhakāro jātoti. "bhante ajja dhammassavanadivaso, na mayaṃ gamissāma, dhammaṃ suṇissāma, ito pubbe dhammassavanampi no natthīti. "tenahi sāmaṇera dīpaṃ jāletvā dhammassavanakālaṃ ugghosehīti. So tathā akāsi. Atha naṃ thero āha "tissa tava upaṭṭhākā `dhammaṃ sotukāmamhāti vadanti, kathehi tesaṃ dhammanti. Upāsakā ekappahāreneva uṭṭhāya "bhante amhākaṃ ayyo `sukhitā hotha, dukkhā muccathāti imāni dve padāni ṭhapetvā aññaṃ dhammakathaṃ na jānāti, amhākaṃ aññaṃ dhammakathikaṃ dethāti vadiṃsu. Sāmaṇero pana arahattaṃ patvāpi neva tesaṃ dhammakathaṃ kathesi. Tadā pana naṃ upajjhāyo "sāmaṇera kathaṃ pana sukhitā honti, dukkhā muccanti; imesaṃ no dvinnaṃ padānaṃ atthaṃ kathehīti āha. So "sādhu bhanteti cittavījaniṃ gahetvā dhammāsanaṃ abhiruyha pañcahi nikāyehi atthañca kāraṇañca ākaḍḍhitvā ghanavassaṃ Vassanto cātudīpakamahāmegho viya khandhadhātuāyatanabodhipakkhiyadhamme vibhajanto arahattanikūṭena dhammakathaṃ kathetvā "bhante evaṃ arahattappattassa sukhaṃ hoti, arahattappattoyeva dukkhā muccati, sesajanā jātidukkhādīhi ceva nirayadukkhādīhi ca na parimuccantīti āha. "sādhu sāmaṇera sukathito te padabhāṇo, idāni sarabhāṇaṃ bhaṇāhīti. So sarabhāṇampi bhaṇi. Aruṇe uggacchante, sāmaṇerassa upaṭṭhākamanussā dve bhāgā ahesuṃ. Ekacce "na vata no ito pubbe evarūpo kakkhaḷo diṭṭhapubbo, kathañhi nāma evarūpaṃ dhammakathaṃ jānanto ettakaṃ kālaṃ mātāpituṭṭhāne ṭhatvā upaṭṭhahantānaṃ manussānaṃ ekampi dhammapadaṃ na kathesīti kujjhiṃsu. Ekacce "lābhā vata no, ye mayaṃ evarūpaṃ bhadantaṃ guṇaṃ vā aguṇaṃ vā ajānantāpi upaṭṭhahimhā, idāni panassa santike dhammaṃ sotuṃ labhimhāti tussiṃsu. Sammāsambuddhopi taṃ divasaṃ paccūsasamaye lokaṃ olokento vanavāsitissassa upaṭṭhāke attano ñāṇajālassa anto paviṭṭhe disvā "kinnu kho bhavissatīti āvajjanto imamatthaṃ upadhāresi "vanavāsitissassa upaṭṭhākā ekacce kuddhā, ekacce tuṭṭhā, mayhaṃ puttassa pana sāmaṇerassa kuddhā nirayagāmino bhavissanti, gantabbameva tattha mayā, mayi gate, sabbepi te sāmaṇere mettacittaṃ katvā dukkhā muccissantīti. Tepi manussā bhikkhusaṅghaṃ nimantetvā gāmaṃ gantvā maṇḍapaṃ kāretvā yāgubhattādīni sampādetvā āsanāni paññāpetvā saṅghassa āgamanaṃ olokentā nisīdiṃsu. Bhikkhūpi sarīrapaṭijagganaṃ katvā bhikkhācāravelāya Gāmaṃ pavisantā sāmaṇeraṃ pucchiṃsu "kiṃ nu tissa amhehi saddhiṃ gamissasi, udāhu pacchāti. "mama gamanavelāyameva gamissāmi, gacchatha tumhe bhanteti. Bhikkhū pattacīvaramādāya pāvisiṃsu. Satthā jetavanasmiṃyeva cīvaraṃ pārupitvā pattamādāya ekacittakkhaṇeneva gantvā bhikkhūnaṃ purato ṭhitameva attānaṃ dassesi. "sammāsambuddho āgatoti sakalagāmo saṅkhubhitvā ekakolāhalo ahosi. Manussā udaggacittā buddhappamukhaṃ bhikkhusaṅghaṃ nisīdāpetvā yāguṃ datvā khajjakaṃ adaṃsu. Sāmaṇero, bhatte aniṭṭhiteyeva, antogāmaṃ pāvisi. Gāmavāsino nīharitvā tassa sakkaccaṃ bhikkhaṃ adaṃsu. So yāpanamattaṃ gahetvā satthu santikaṃ gantvā pattaṃ upanāmesi. Satthā "āhara tissāti hatthaṃ pasāretvā pattaṃ gahetvā "passa sārīputta tava sāmaṇerassa pattanti therassa dassesi. Thero satthu hatthato pattaṃ gahetvā sāmaṇerassa datvā "gaccha, attano pattaṭṭhāne nisīditvā bhattakiccaṃ karohīti āha. Gāmavāsino buddhappamukhaṃ bhikkhusaṅghaṃ parivisitvā satthāraṃ anumodanaṃ yāciṃsu. Satthā anumodanaṃ karonto evamāha "lābhā vo upāsakā, ye tumhe attano kulupakaṃ sāmaṇeraṃ nissāya `sārīputtaṃ moggallānaṃ kassapanti asītimahāsāvake dassanāya labhatha, ahampi tumhākaṃ kulupakameva nissāya āgato, buddhadassanampi vo imaṃ nissāyeva laddhaṃ, lābhā vo, suladdhaṃ voti. Manussā cintayiṃsu "aho amhākaṃ lābhā; buddhānañceva bhikkhusaṅghassa ca ārādhanasamatthaṃ amhākaṃ ayyaṃ dassanāya labhāma, deyyadhammañcassa dātuṃ labhāmāti. Sāmaṇerassa kuddhamanussā tussiṃsu. Tuṭṭhamanussā bhiyyoso mattāya pasīdiṃsu. Anumodanāvasāne ca bahū sotāpattiphalādīni pāpuṇiṃsu. Satthā uṭṭhāyāsanā pakkāmi. Manussā satthāraṃ anugantvā vanditvā nivattiṃsu.