etadariyā sevanti, etaṃ loke anāmatanti imaṃ dukanipāte upasāḷhakajātakaṃ kathesi. Iti paṭhaviyaṃ sarīranikkhepaṃ katvā marantesu amatapubbe padese marantā nāma natthi. Ānandattherasadisā pana amatapubbe padese parinibbāyanti.

Ānandatthero kira vīsavassasatikakāle āyusaṅkhāraṃ olokento parikkhīṇabhāvaṃ ñatvā "ito sattame divase parinibbāyissāmīti ārocesi. Taṃ pavattiṃ sutvā rohiṇīnadiyā ubhayatīravāsikesu manussesu orimatīravāsikā "mayaṃ therassa bahupakārā, amhākaṃ santike parinibbāyissatīti vadiṃsu. Pārimatīravāsikā "mayaṃ therassa bahupakārā, amhākaṃ santike parinibbāyissatīti. Thero tesaṃ vacanaṃ sutvā "ubhayatīravāsinopi mayhaṃ upakārakāva, `ime nāma anupakārāti na sakkā vattuṃ; sacāhaṃ orimatīre parinibbāyissāmi, pārimatīravāsino dhātuggahaṇatthaṃ tehi saddhiṃ kalahaṃ karissanti; sace pārimatīre parinibbāyissāmi,

Orimatīravāsino tathā karissanti; kalaho uppajjamānopi maṃ nissāyeva uppajjissati, vūpasamamānopi maṃ nissāyeva vūpasamissatīti cintetvā "orimatīravāsinopi mayhaṃ upakārakā, pārimatīravāsinopi mayhaṃ upakārakā, anupakārako nāma natthi; orimatīravāsino orimatīreyeva sannipatantu, pārimatīravāsino pārimatīreyevāti āha. Tato sattame divase majjhe nadiyā sattatālappamāṇe ākāse pallaṅkena nisīditvā mahājanassa dhammaṃ kathetvā "mama sarīraṃ majjhe bhijjitvā, eko bhāgo orimatīre patatu; eko pārimatīreti adhiṭṭhāya yathānisinnova tejodhātuṃ samāpajji. Aggijālā uṭṭhahiṃsu. Sarīraṃ majjhe bhijjitvā, eko bhāgo orimatīre pati, eko pārimatīre. Mahājano paridevi. Paṭhavīudriyanasaddo viya ārodanasaddo ahosi satthu parinibbāne ārodanasaddatopi kāruññataro. Manussā cattāro māse rodantā paridevantā "satthu pattacīvaraggāhake tiṭṭhante, satthu ṭhitakālo viya no ahosi, idāni no satthā parinibbutoti vippalapantā vicariṃsu.