TIPITAKA Volume 25 : PALI ROMAN Sutta Pitaka Vol 17 : Sutta. Khu. khuddakapāṭho-dhammapadagāthā-udānaṃ-itivuttakaṃ-suttanipāto Itivuttake ekanipātassa tatiyavaggo

[199] 1 Vuttaṃ hetaṃ bhagavatā vuttamarahatāti me sutaṃ idhāhaṃ bhikkhave ekaccaṃ puggalaṃ pasannacittaṃ evaṃ cetasā ceto paricca pajānāmi imamhi cāyaṃ samaye puggalo kālaṃ kareyya yathābhataṃ nikkhitto evaṃ sagge taṃ kissa hetu cittañhissa bhikkhave pasannaṃ cetopasādahetu kho pana bhikkhave evamidhekacce sattā kāyassa bhedā parammaraṇā sugatiṃ saggaṃ lokaṃ upapajjantīti . etamatthaṃ bhagavā avoca. Tatthetaṃ iti vuccati pasannacittaṃ ñatvāna ekaccaṃ idha puggalaṃ etamatthaṃ byākāsi buddho bhikkhūna santike imamhi cāyaṃ samaye kālaṃ kayirātha puggalo sugatiṃ upapajjeyya cittañhissa pasāditaṃ yathā haritvā nikkhipeyya evameva tathāvidho cetopasādahetū hi sattā gacchanti sugatinti. Ayampi attho vutto bhagavatā iti me sutanti. Paṭhamaṃ.