TIPITAKA Volume 25 : PALI ROMAN Sutta Pitaka Vol 17 : Sutta. Khu. khuddakapāṭho-dhammapadagāthā-udānaṃ-itivuttakaṃ-suttanipāto

[214] 9 Vuttaṃ hetaṃ bhagavatā vuttamarahatāti me sutaṃ nayidaṃ bhikkhave brahmacariyaṃ vussati janakuhanatthaṃ na janalapanatthaṃ na lābhasakkārasilokānisaṃsatthaṃ na iti maṃ jano jānātūti atha kho idaṃ bhikkhave brahmacariyaṃ vussati abhiññatthañceva pariññatthañcāti . Etamatthaṃ bhagavā avoca. Tatthetaṃ iti vuccati abhiññatthaṃ pariññatthaṃ brahmacariyaṃ anītihaṃ adesayi so bhagavā nibbānogadhagāminaṃ esa maggo mahatthehi anuyāto mahesibhi ye ye taṃ paṭipajjanti yathā buddhena desitaṃ dukkhassantaṃ karissanti satthu sāsanakārinoti. Ayampi attho vutto bhagavatā iti me sutanti. Navamaṃ.