TIPITAKA Volume 25 : PALI ROMAN Sutta Pitaka Vol 17 : Sutta. Khu. khuddakapāṭho-dhammapadagāthā-udānaṃ-itivuttakaṃ-suttanipāto Suttanipāte dutiyassa cūḷavaggassa aṭṭhamaṃ nāvāsuttaṃ

[325] |325.742| 8 Yasmā hi dhammaṃ puriso vijaññā indaṃva naṃ devatā pūjayeyya so pūjito tasmiṃ pasannacitto bahussuto pātukaroti dhammaṃ. |325.743| Tadaṭṭhikatvāna nisamma dhīro dhammānudhammaṃ paṭipajjamāno viññū vibhāvī nipuṇo ca hoti yo tādisaṃ bhajati appamatto. |325.744| Khuddañca bālaṃ upasevamāno anāgatatthañca usuyyakañca idheva dhammaṃ avibhāvayitvā avitiṇṇakaṅkho maraṇaṃ upeti. |325.745| Yathā naro āpagaṃ otaritvā mahodakaṃ salilaṃ sīghasotaṃ so vuyhamāno anusotagāmī kiṃ so pare sakkhati tārayetuṃ. |325.746| Tatheva dhammaṃ avibhāvayitvā bahussutānaṃ anisāmayatthaṃ sayaṃ ajānaṃ avitiṇṇakaṅkho Kiṃ so pare sakkhati nijjhapetuṃ. |325.747| Yathāpi nāvaṃ daḷhamāruhitvā piyenarittena samaṅgibhūto so tāraye tattha bahūpi aññe tatrūpayaññū kusalo matimā 1- |325.748| evampi yo vedagu bhāvitatto bahussuto hoti avedhadhammo so kho pare nijjhapaye pajānaṃ sotāvadhānopanisūpapanne. |325.749| Tasmā have sappurisaṃ bhajetha medhāvinañceva bahussutañca aññāya atthaṃ paṭipajjamāno viññātadhammo sa 2- sukhaṃ labhethāti. Nāvāsuttaṃ aṭṭhamaṃ -------