TIPITAKA Volume 25 : PALI ROMAN Sutta Pitaka Vol 17 : Sutta. Khu. khuddakapāṭho-dhammapadagāthā-udānaṃ-itivuttakaṃ-suttanipāto Udāne pañcamo soṇattheravaggo

[110] 1 Evamme sutaṃ . ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena rājā pasenadi kosalo mallikāya deviyā saddhiṃ uparipāsādavaragato hoti . Atha kho rājā pasenadi kosalo mallikaṃ deviṃ etadavoca atthi nu kho te mallike kocañño attanā piyataroti . natthi kho me mahārāja kocañño attanā piyataro tuyhaṃ pana mahārāja atthañño koci attanā piyataroti . mayhampi mallike natthañño koci attanā piyataroti. {110.1} Atha kho rājā pasendi kosalo pāsādā orohitvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho rājā pasenadi kosalo bhagavantaṃ etadavoca idhāhaṃ bhante mallikāya deviyā saddhiṃ uparipāsādavaragato mallikaṃ deviṃ etadavocaṃ atthi nu kho te mallike kocañño attanā piyataroti evaṃ vutte mallikā devī 1- etadavoca natthi kho me mahārāja kocañño attanā piyataro tuyhaṃ pana mahārāja atthañño koci attanā piyataroti evaṃ vuttehaṃ bhante mallikaṃ deviṃ etadavocaṃ mayhampi kho mallike natthañño koci attanā piyataroti . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi @Footnote: 1 Ma. Yu. maṃ. Sabbā disā anuparigamma cetasā nevajjhagā piyataramattanā kvaci evampi 1- so puthu attā paresaṃ tasmā na hiṃse paraṃ attakāmoti. Suttaṃ paṭhamaṃ.