๔. อโลมวิมาน

42. 4. Alomavimānavaṇṇanā

abhikkantena vaṇṇenāti alomavimānaṃ. Tassa kā uppatti? bhagavā bārāṇasiyaṃ isipatane migadāye viharanto pubbaṇhasamayaṃ nivāsetvā pattacīvaraṃ ādāya bārāṇasiṃ piṇḍāya pāvisi. Tatthekā alomā nāma duggatitthī bhagavantaṃ disvā pasannacittā aññaṃ dātabbaṃ apassantī "īdisampi bhagavato dinnaṃ mayhaṃ mahapphalaṃ bhavissatī"ti cintetvā paribhinnavaṇṇaṃ aloṇaṃ sukkhakummāsaṃ upanesi, taṃ 1- bhagavā paṭiggahesi. Sā taṃ dānaṃ ārammaṇaṃ katvā somanassaṃ pavedesi, sā aparabhāge kālaṃ katvā tāvatiṃsesu nibbatti. Taṃ āyasmā mahāmoggallāno:-

"abhikkantena vaṇṇena yā tvaṃ tiṭṭhasi devate

obhāsentī disā sabbā osadhī viya tārakā.

Kena te'tādiso vaṇṇo kena te idha mijjhati

uppajjanti ca te bhogā ye keci manaso piyā.

Pucchāmi taṃ devi mahānubhāve

manussabhūtā kimakāsi puññaṃ

@Footnote: 1 cha.Ma. ayaṃ pāṭho na dissati

Kenāsi evañjalitānubhāvā

vaṇṇo ca te sabbadisā pabhāsatī"ti pucchi. Sāpi tassa byākāsi, taṃ dassetuṃ vuttaṃ:-

"sā devatā attamanā moggallānena pucchitā

pañhaṃ puṭṭhā viyākāsi yassa kammassidaṃ phalan"ti.

Ahañca bārāṇasiyaṃ buddhassādiccabandhuno

adāsiṃ sukkhakummāsaṃ pasannā sehi pāṇibhi.

Sukkhāya aloṇikāya ca passa phalaṃ kummāsapiṇḍiyā

alomaṃ sukhitaṃ disvā ko puññaṃ na karissati.

Tena me'tādiso vaṇṇo tena me idha mijjhati

uppajjanti ca me bhogā ye keci manaso piyā.

Akkhāmi te bhikkhu mahānubhāva

manussabhūtā yamakāsi puññaṃ

tenamhi evañjalitānubhāvā

vaṇṇo ca me sabbadisā pabhāsatī"ti.

#[716] Tattha alomaṃ sukhitaṃ disvāti alomampi nāma sukkhakummāsamattaṃ datvā evaṃ dibbasukhena sukhitaṃ disvā. Ko puññaṃ na karissatīti ko nāma attano hitasukhaṃ icchanto puññaṃ na karissatīti. Sesaṃ vuttanayameva.