๑๐๙. ๑๒. กณฺณมุณฺฑเปติวตฺถุวณฺณนา

โสณฺณโสปานผลกาติ อิทํ สตฺถริ สาวตฺถิยํ วิหรนฺเต กณฺณมุณฺฑเปตึ อารพฺภ วุตฺตํ.

อตีเต กิร กสฺสปพุทฺธกาเล กิมิลนคเร ๑- อญฺญตโร อุปาสโก โสตาปนฺโน ปญฺจหิ อุปาสกสเตหิ สทฺธึ สมานจฺฉนฺโท หุตฺวา อารามโรปนเสตุพนฺธนจงฺกมน- กรณาทีสุ ปุญฺญกมฺเมสุ ปสุโต หุตฺวา วิหรนฺโต สํฆสฺส วิหารํ กาเรตฺวา เตหิ สทฺธึ กาเลน กาลํ วิหารํ คจฺฉติ. เตสํ ภริยาโยปิ อุปาสิกา หุตฺวา อญฺญมญฺญํ สมคฺคา มาลาคนฺธวิเลปนาทิหตฺถา กาเลน กาลํ วิหารํ คจฺฉนฺติโย อนฺตรามคฺเค อารามสภาทีสุ วิสฺสมิตฺวา คจฺฉนฺติ.

อเถกทิวสํ กติปยา ธุตฺตา เอกิสฺสา สภาย สนฺนิสินฺนา ตาสุ ตตฺถ วิสฺสมิตฺวา คตาสุ ตาสํ รูปสมฺปตฺตึ ทิสฺวา ปฏิพทฺธจิตฺตา หุตฺวา ตาสํ สีลาจารคุณสมฺปนฺนตํ ญตฺวา กถํ สมุฏฺฐาเปสุํ "โก เอตาสุ เอกิสฺสาปิ สีลเภทํ กาตุํ สมตฺโถ"ติ. ตตฺถ อญฺญตโร "อหํ สมตฺโถ"ติ อาห. เต เตน "สหสฺเสน อพฺภุตํ กโรมา"ติ อพฺภุตํ อกํสุ. กเต ตว สหสฺสํ อเมฺหหิ เทยฺยํ, อกเต ตยา อมฺหากํ ทเทยฺยํ ๒-, โส ๓- อเนเกหิ อุปาเยหิ วายมมาโน ๔- ตาสุ สภํ ๕- อาคตาสุ สุมุญฺจิตํ สตฺตตนฺตึ มธุรสฺสรํ วีณํ วาเทนฺโต มธุเรเนว สเรน กามปฏิสํยุตฺตคีตานิ คายนฺโต คีตสทฺเทน ตาสุ อญฺญตรํ อิตฺถึ สีลเภทํ ปาเปนฺโต อติจารินึ กตฺวา เต ธุตฺเต ๖- สหสฺสํ ปราเชสิ. เต สหสฺสปราชิตา ๗- ตสฺสา สามิกสฺส อาโรเจสุํ. สามิโก ตํ ปุจฺฉิ ๘- "กึ ตฺวํ เอวรูปา, ยถา เต ปุริสา อโวจุนฺ"ติ. สา "นาหํ อีทิสํ ชานามี"ติ ปฏิกฺขิปิตฺวา ตสฺมึ อสทฺทหนฺเต สมีเป ฐิตํ สุนขํ ทสฺเสตฺวา สปถํ อกาสิ "สเจ มยา ตาทิสํ ปาปกมฺมํ กตํ, อยํ ฉินฺนกณฺโณ กาฬสุนโข ตตฺถ ตตฺถ ภเว ชาตํ มํ ขาทตู"ติ.