๑. ปีฐวคฺค

๑. ปฐมปีฐวิมานวณฺณนา

ตตฺถ ปฐมวตฺถุสฺสาปิ ๑- อยํ อฏฺฐุปฺปตฺติ:- ภควติ สาวตฺถิยํ วิหรนฺเต เชตวเน อนาถปิณฺฑิกสฺส อาราเม รญฺญา ปเสนทิโกสเลน พุทฺธปฺปมุขสฺส ภิกฺขุสํฆสฺส สตฺตาหํ อสทิสทาเน ปวตฺติเต ตทนุรูเปน อนาถปิณฺฑิเกน มหาเสฏฺฐินา ตโย ทิวเส, ตถา วิสาขาย มหาอุปาสิกาย มหาทาเน ทินฺเน อสทิสทานสฺส ปวตฺติ สกลชมฺพุทีเป ปากฏา อโหสิ. อถ มหาชโน ๒- ตตฺถ ตตฺถ กถํ สมุฏฺฐาเปสิ ๓- "กึ นุ โข เอวํ อุฬารวิภวปริจฺจาเคเนว ทานํ มหปฺผลตรํ ภวิสฺสติ, อุทาหุ อตฺตโน วิภวานุรูปปริจฺจาเคนาปี"ติ. ภิกฺขู ๔- ตํ กถํ สุตฺวา ภควโต อาโรเจสุํ. ภควา "น ภิกฺขเว เทยฺยธมฺมสมฺปตฺติยาว ทานํ มหปฺผลตรํ ภวิสฺสติ, อถ โข จิตฺตปสาทสมฺปตฺติยา จ เขตฺตสมฺปตฺติยา จ, ตสฺมา กุณฺฑกมุฏฺฐิมตฺตมฺปิ ปิโลติกามตฺตมฺปิ ติณสนฺถารมตฺตมฺปิ ปณฺณสณฺฐารมตฺตมฺปิ ปูติมุตฺตหรีตกมตฺตมฺปิ วิปฺปสนฺเนน เจตสา ทกฺขิเณยฺยปุคฺคเล ปติฏฺฐาปิตํ ตมฺปิ มหปฺผลตรํ ภวิสฺสติ มหาชุติกํ มหาวิปฺผารนฺ"ติ ๕- อาห. ตถา หิ วุตฺตํ สกฺเกน เทวานมินฺเทน:-

"นตฺถิ จิตฺเต ปสนฺนมฺหิ อปฺปิกา นาม ทกฺขิณา