เอตฺถาห:- "กึ ปน เปตฺติวิสยูปปนฺนา เอว ญาตี เหตุสมฺปตฺติโย ลภนฺติ, อุทาหุ อญฺเญปี"ติ? น เจตฺถ อเมฺหหิ วตฺตพฺพํ อตฺถิ ภควตา เอว พฺยากตตฺตา. วุตฺตํ เหตํ:-

"มยมสฺสุ โภ โคตม พฺราหฺมณา นาม ทานานิ เทม, ปุญฺญานิ กโรม `อิทํ ทานํ เปตานํ ญาติสาโลหิตานํ อุปกปฺปตุ, อิทํ ทานํ เปตา ญาติสาโลหิตา ปริภุญฺชนฺตู'ติ. กจฺจิ ตํ โภ โคตม ทานํ เปตานํ ญาติสาโลหิตานํ อุปกปฺปติ, กจฺจิ เต เปตา ญาติสาโลหิตา ตํ ทานํ ปริภุญฺชนฺตีติ. ฐาเน โข พฺราหฺมณ อุปกปฺปติ โน อฏฺฐาเนติ.

กตมํ ปน โภ โคตม ฐานํ, กตมํ อฏฺฐานนฺติ. อิธ พฺราหฺมณ เอกจฺโจ ปาณาติปาตี โหติ ฯเปฯ มิจฺฉาทิฏฺฐิโก โหติ, โส กายสฺส เภทา ปรํ มรณา นิรยํ อุปปชฺชติ, โย เนรยิกานํ สตฺตานํ อาหาโร, เตน โส ตตฺถ ยาเปติ, เตน โส ตตฺถ ติฏฺฐติ. อิทํ โข พฺราหฺมณ อฏฺฐานํ, ยตฺถ ฐิตสฺส ตํ ทานํ น อุปกปฺปติ.