ตสฺมา เอตํ น โรทามิ คโต โส ตสฺส ยา คตี"ติ คาถาทฺวยมาห.

ตตฺถ ทารโกติ พาลทารโก. จนฺทนฺติ จนฺทมณฺฑลํ. คจฺฉนฺตนฺติ นภํ อพฺภุสฺสุกฺกมานํ. ๑- อนุโรทตีติ "มยฺหํ รถจกฺกํ คเหตฺวา เทหี"ติ อนุโรทติ.

เอวํ ตสฺส ภริยาย วจนํ สุตฺวา ทาสึ ปุจฺฉิ "อมฺม ตุยฺหํ โส กึ โหตี"ติ. อยฺโย เม สามีติ. ยทิ เอวํ เตน ตฺวํ โปเถตฺวา เวยฺยาวจฺจํ การิตา ภวิสฺสสิ, ตสฺมา มญฺเญ "สุมุตฺตาหํ เตนา"ติ น โรทสีติ. สามิ มา มํ เอวํ อวจ, น เจตํ อนุจฺฉวิกํ, ๑- อติวิย ขนฺติเมตฺตานุทฺทยาสมฺปนฺโน ยุตฺตวาที มยฺหํ อยฺยปุตฺโต อุเร สํวฑฺฒปุตฺโต วิย อโหสีติ. อถ กสฺมา น โรทสีติ. สาปิ อตฺตโน อโรทนการณํ กเถนฺตี:-