อถ อมฺหากํ ภควติ โลเก อุปฺปชฺชิตฺวา ปวตฺติตวรธมฺมจกฺเก อนุกฺกเมน สาวตฺถิยํ วิหรนฺเต สาวตฺถิวาสิโน วาณิชา ปญฺจมตฺตานิ สกฏสตานิ ภณฺฑสฺส ปูเรตฺวา อุตฺตราปถํ คนฺตฺวา ภณฺฑํ วิกฺกิณิตฺวา ปฏิลทฺธภณฺฑํ สกเฏสุ อาโรเปตฺวา ปฏินิวตฺตมานา สายนฺหสมเย อญฺญตรํ สุกฺขนทึ ๑- ปาปุณิตฺวา ตตฺถ ยานํ ๒- มุญฺจิตฺวา รตฺติยํ วาสํ กปฺเปสุํ. อถ โส เปโต ปิปาสาภิภูโต ปานียสฺสตฺถาย อาคนฺตฺวา ตตฺถ พินฺทุมตฺตมฺปิ ปานียํ อลภิตฺวา วิคตาโส ๓- ฉินฺนมูโล วิย ตาโล ฉินฺนปาโท ปติ, ตํ ทิสฺวา วาณิชา:-

[๒๒๗] "นคฺโค ทุพฺพณฺณรูโปสิ กิโส ธมนิสนฺถโต

อุปฺผาสุลิโก กิสิโก โก นุ ตฺวมสิ มาริสา"ติ อิมาย คาถาย ปุจฺฉึสุ. ตโต เปโต:-

[๒๒๘] "อหํ ภทนฺเต เปโตมฺหิ ทุคฺคโต ยมโลกิโก