เอวํ องฺกุเรน "ทานํ ทสฺสามี"ติ ปฏิญฺญาย กตาย ยกฺโข ตุฏฺฐมานโส "มาริส ตฺวํ วิสฺสตฺโถ ทานํ เทหิ, อหํ ปน เต สหายกิจฺจํ กริสฺสามิ, เยน เต เทยฺยธมฺโม น ปริกฺขยํ คมิสฺสติ, เตน ปกาเรน กริสฺสามี"ติ ตํ ทานกิริยาย สมุตฺเตเชตฺวา "พฺราหฺมณ วาณิช ตฺวํ กิร มาทิเส พลกฺกาเรน เนตุกาโม อตฺตโน ปมาณํ น ชานาสี"ติ ตสฺส ภณฺฑมนฺตรธาเปตฺวา ตํ ยกฺขวิภึสกาย ภึสาเปนฺโต สนฺตชฺเชสิ. อถ นํ องฺกุโร นานปฺปการํ ยาจิตฺวา พฺราหฺมเณน ขมาเปนฺโต ปสาเทตฺวา สพฺพภณฺฑํ ปากติกํ การาเปตฺวา รตฺติยา อุปคตาย ยกฺขํ วิสฺสชฺเชตฺวา

[๒๘๓] "เกน เต องฺคุลี กุณา ๑- มุขญฺจ กุณลีกตํ

อกฺขีนิ จ ปคฺฆรนฺติ กึ ปาปํ ปกตํ ตยา"ติ คาถมาห.