อถสฺส ปาโตว กสิตฏฺฐานํ ปํสุจุณฺณํ อุปาทาย สพฺพํ รตฺตสุวณฺณํ หุตฺวา กณิการปุปฺผราสิ วิย โสภมานํ อฏฺฐาสิ. โส ปพุทฺโธ โอโลเกตฺวา ๓- ภริยํ อาห "ภทฺเท เอตํ มยา กสิตฏฺฐานํ สพฺพํ มม สุวณฺณํ หุตฺวา ปญฺญายติ, กึ นุ โข เม อติอุสฺสูเร ลทฺธภตฺตตาย อกฺขีนิ ภมนฺตี"ติ. สามิ มยฺหมฺปิ เอวเมว ปญฺญายตีติ. โส อุฏฺฐาย ตตฺถ คนฺตฺวา เอกํ ปิณฺฑํ คเหตฺวา นงฺคลสีเส ปหริตฺวา สุวณฺณภาวํ ญตฺวา "อโห อยฺยสฺส ธมฺมเสนาปติสฺส ทินฺนทาเน อชฺเชว วิปาโก ทสฺสิโต, น โข ปน สกฺกา เอตฺตกํ ธนํ ปฏิจฺฉาเทตฺวา ปริภุญฺชิตุนฺ"ติ ภริยาย อาภตํ ภตฺตปาตึ สุวณฺณสฺส ปูเรตฺวา ราชกุลํ คนฺตฺวา รญฺญา กโตกาโส ปวิสิตฺวา ราชานํ อภิวาเทตฺวา "กึ ตาตา"ติ วุตฺเต "เทว อชฺช มยา กสิตฏฺฐานํ สพฺพํ สุวณฺณราสิเมว ๔- หุตฺวา ฐิตํ, สุวณฺณํ อาหราเปตุํ วฏฺฏตี"ติ อาห. โกสิ ตฺวนฺติ.

@๓ ก. โอโลเกนฺโต ๔ ม. สพฺพํ สุวณฺณภริตเมว, อิ. สพฺพํ สุวณฺณราสิภริตเมว ปุณฺโณ นามาหนฺติ. กึ ปน เต อชฺช กตนฺติ. ธมฺมเสนาปติสฺส เม ปาโตว ทนฺตกฏฺฐญฺจ มุโขทกญฺจ ทินฺนํ, ภริยายปิ เม มยฺหํ อาหฏภตฺตํ ตสฺเสว ทินฺนนฺติ.

ตํ สุตฺวา ราชา "อชฺเชว กิร โภ ธมฺมเสนาปติสฺส ทินฺนทาเน วิปาโก ทสฺสิโต"ติ วตฺวา "ตาต กึ กโรมี"ติ ปุจฺฉิ. พหูนิ สกฏสหสฺสานิ ปหิณิตฺวา สุวณฺณํ อาหราเปถาติ. ราชา สกฏานิ ปหิณิ. ราชปุริเสสุ "รญฺโญ สนฺตกนฺ"ติ คณฺหนฺเตสุ คหิตํ คหิตํ มตฺติกาว โหติ. ๑- เต คนฺตฺวา รญฺโญ อาโรเจตฺวา ๑- "ตาตา ตุเมฺหหิ กินฺติ วตฺวา คหิตนฺ"ติ ปุฏฺฐา "ตุมฺหากํ สนฺตกนฺ"ติ อาหํสุ. "เตน หิ ตาตา ปุน คจฺฉถ, `ปุณฺณสฺส สนฺตกนฺ'ติ วตฺวา คณฺหถา"ติ อาห. เต ตถา กรึสุ. คหิตํ คหิตํ สุวณฺณเมว อโหสิ. ตํ สพฺพํ อาหริตฺวา ราชงฺคเณ ราสึ อกํสุ, อสีติหตฺถุพฺเพโธ ราสิ อโหสิ. ราชา นาคเร สนฺนิปาตาเปตฺวา อาห "อิมสฺมึ นคเร อตฺถิ กสฺสจิ เอตฺตกํ สุวณฺณนฺ"ติ. นตฺถิ เทวาติ. กึ ปนสฺส ทาตุํ วฏฺฏตีติ. เสฏฺฐิจฺฉตฺตํ เทวาติ. ราชา "พหุธนเสฏฺฐี นาม โหตู"ติ มหนฺเตน โภเคน สทฺธึ ตสฺส เสฏฺฐิจฺฉตฺตํ อทาสิ.