"ตํ หิ ตสฺส สกํ โหติ ตญฺจ อาทาย คจฺฉติ

ตญฺจสฺส อนุคํ โหติ ฉายาว อนปายินี"ติ. ๒-

ยสสา จ ยสสฺสินีติ "อุตฺตรา อุปาสิกา สีลาจารสมฺปนฺนา อนุสฺสุกี อมจฺฉรี อกฺโกธนา"ติอาทินา "อาคตผลา วิญฺญาตสาสนา"ติอาทินา จ ยถาภูตคุณาธิคเตน ชลตเล เตเลน วิย สมนฺตโต ปตฺถเฏน กิตฺติสทฺเทน ยสสฺสินี กิตฺติมตี, เตน วา สีลคุเณน อิธ อธิคเตน ยสปริวาเรน ยสสฺสินี สมฺปนฺนปริวารา. อนุโภมิ สกํ ปุญฺญนฺติ ยถูปจิตํ อตฺตโน ปุญฺญํ ปจฺจนุโภมิ. ยสฺส หิ ปุญฺญผลํ อนุภูยติ, ผลูปจาเรน ตํ ปุญฺญมฺปิ อนุภูยตีติ วุจฺจติ. อถ วา ปุถุชฺชนภาวโต สุจริตผลมฺปิ "ปุญฺญนฺ"ติ วุจฺจติ. ยถาห "กุสลานํ ภิกฺขเว ธมฺมานํ สมาทานเหตุ เอวมิทํ ปุญฺญํ ปวฑฺฒตี"ติ. ๓- สุขิตา จมฺหิ'นามยาติ ทิพฺพสุเขน จ ผลสุเขน จ สุขิตา จ อมฺหิ ภวามิ, กายิกเจตสิกทุกฺขาภาวโต อนามยา อโรคา.