๑๔๔. ๗. ภลฺลิยตฺเถรคาถาวณฺณา

โยปานุทีติ อายสฺมโต ภลฺลิยตฺเถรสฺส คาถา. กา อุปฺปตฺติ?

อยํ กิร อิโต เอกตึเส กปฺเป อนุปฺปนฺเน สุมนสฺส นาม ปจฺเจก- พุทฺธสฺส ปสนฺนจิตฺโต ผลาผลํ ทตฺวา สุคตีสุเอว สํสรนฺโต สิขิสฺส สมฺมา- สมฺพุทฺธสฺส กาเล อรุณวตีนคเร สตฺถวาหกุเล ๑- นิพฺพตฺโต "สิขิสฺส ภควโต ปฐมาภิ- สมฺพุทฺธสฺส อุปชิตอุชิตา ๒- นาม เทฺว สตฺถวาหปุตฺตา ปฐมาหารํ อทํสู"ติ สุตฺวา อตฺตโน สหายเกน สทฺธึ ภควนฺตํ อุปสงฺกมิตฺวา วนฺทิตฺวา สฺวาตนาย นิมนฺเตตฺวา มหาทานํ ปวตฺเตตฺวา ปตฺถนมกาสิ ๓- "อุโภปิ มยํ ภนฺเต อนาคเต ตุมฺหาทิสสฺส พุทฺธสฺส ปฐมาหารทายกา ภเวยฺยามา"ติ. เต ตตฺถ ตตฺถ ภเว ปุญฺญกมฺมํ กตฺวา เทฺวมนุสฺเสสุ สํสรนฺตา กสฺสปสฺส ภควโต กาเล โคปาลกเสฏฺฐิปุตฺตา ภาตโร หุตฺวา นิพฺพตฺตา. พหูนิ วสฺสานิ ภิกฺขุสํฆํ ขีรโภชเนน อุปฏฺฐหึสุ. อมฺหากํ ปน ภควโต กาเล โปกฺขรวตีนคเร สตฺถวาหปุตฺตา ภาตโร หุตฺวา นิพฺพตฺตา. เตสุ เชฏฺโฐ ตปุสฺโส ๔- นาม, กนิฏฺโฐ ภลฺลิโย นาม, เต ปญฺจมตฺตานิ สกฏสตานิ ภณฺฑสฺส ปูเรตฺวา วาณิชฺชาย คจฺฉนฺตา ภควติ ปฐมาภิสมฺพุทฺเธ สตฺตสตฺตาหํ วิมุตฺติสุขธมฺมปจฺจเวกฺขณาหิ วีตินาเมตฺวา อฏฺฐเม สตฺตาเห ราชายตน- มูเล วิหรนฺเต ราชายตนสฺส อวิทูเร มหามคฺเคน อติกฺกมนฺติ, เตสํ ตสฺมึ สมเย สเมปิ ภูมิภาเค อกทฺทโมทเก สกฏานิ นปฺปวตฺตึสุ, "กึ นุ โข การณนฺ"ติ จ จินฺเตนฺตานํ โปราณสาโลหิตา เทวตา รุกฺขวิฏปพฺภนฺตเร ๕- อตฺตานํ ทสฺเสนฺตี อาห "มาทิสา อยํ ภควา อจิราภิสมฺพุทฺโธ สตฺตสตฺตาหํ อนาหาโร วิมุตฺติสุขํ ปฏิสํเวที ๖- อิทานิ ราชายตนมูเล นิสินฺโน, ตํ อาหาเรน ปฏิมาเนถ, ยทสฺส ตุมฺหากํ ทีฆรตฺตํ หิตาย สุขายา"ติ. ตํ สุตฺวา เต อุฬารํ ปีติโสมนสฺสํ