อเถกทิวสํ สตฺตวสฺสิกํ ตํ ภควา ปจฺจูสเวลาย ญาณชาลํ ปตฺถริตฺวา เวเนยฺยพนฺธเว โอโลเกตฺวา ๑- ญาณชาลนฺโตคธํ ทิสฺวา สุสานฏฺฐานํ อคมาสิ. ทารโก ปุพฺพเหตุนา โจทิยมาโน ปสนฺนมานโส สตฺถารํ อุปสงฺกมิตฺวา วนฺทิตฺวา อฏฺฐาสิ. สตฺถา ตสฺส ธมฺมํ กเถสิ. โส ธมฺมํ สุตฺวา ปพฺพชฺชํ ยาจิตฺวา "ปิตรา อนุญฺญาโตสี"ติ วุตฺโต ปิตรํ สตฺถุ สนฺติกํ เนสิ. ๒- ตสฺส ปิตา สตฺถารํ อุปสงฺกมิตฺวา วนฺทิตฺวา "ภนฺเต อิมํ ทารกํ ปพฺพาเชถา"ติ อนุชานิ. สตฺถา ตํ ปพฺพาเชตฺวา เมตฺตาภาวนาย นิโยเชสิ. โส เมตฺตากมฺมฏฺฐานํ คเหตฺวา สุสาเน วิหรนฺโต น จิรสฺเสว เมตฺตาฌานํ นิพฺพตฺเตตฺวา ฌานํ ปาทกํ กตฺวา วิปสฺสนํ วฑฺเฒตฺวา อรหตฺตํ สจฺฉากาสิ. เตน วุตฺตํ อปทาเน ๓- :-

"กกุสนฺโธ มหาวีโร สพฺพธมฺมาน ปารคู

คณมฺหา วูปกฏฺโฐ โส อคมาสิ วนนฺตรํ.

พีชมิญฺชํ ๔- คเหตฺวาน ลตาย อาวุณึ ๕- อหํ