ทุคฺคตึ นาภิชานามิ พุทฺธปูชายิทํ ๑- ผลํ.

กิเลสา ฌาปิตา มยฺหํ ฯเปฯ กตํ พุทฺธสฺส สาสนนฺ"ติ.

อรหตฺตํ ปน ปตฺวา เถโร วิมุตฺติสุขํ ปฏิสํเวเทนฺโต สาเกเต วิหรติ อญฺชนวเน. เตน จ สมเยน ภควา มหตา ภิกฺขุสํเฆน สทฺธึ สาเกตํ คนฺตฺวา อญฺชนวเน วิหาสิ. เสนาสนํ นปฺปโหสิ. สมฺพหุลา ภิกฺขู วิหารสามนฺตา สรภุยา นทิยา วาลิกาปุฬิเน สยึสุ. อถ อฑฺฒรตฺตสมเย นทิยา อุทโกเฆ อาคจฺฉนฺเต สามเณราทโย อุจฺจาสทฺทมหาสทฺทา อเหสุํ. ภควา ตํ ญตฺวา อายสฺมนฺตํ ควมฺปตึ อาณาเปสิ "คจฺฉ ควมฺปติ ชโลฆํ วิกฺขมฺเภตฺวา ภิกฺขูนํ ผาสุวิหารํ กโรหี"ติ. เถโร "สาธุ ภนฺเต"ติ อิทฺธิพเลน นทีโสตํ วิกฺขมฺภิ, ตํ ทูรโตว ปพฺพตกูฏํ วิย อฏฺฐาสิ. ตโต ปฏฺฐาย เถรสฺส อานุภาโว โลเก ปากโฏ อโหสิ. อเถกทิวสํ สตฺถา มหติยา เทวปริสาย มชฺเฌ นิสีทิตฺวา ธมฺมํ เทเสนฺตํ เถรํ ทิสฺวา โลกานุกมฺปาย ตสฺส คุณานํ วิภาวนตฺถํ ตํ ปสํสนฺโต:-

๒- "โย อิทฺธิยา สรภุํ อฏฺฐเปสิ